तेहरान । इरानले विश्वकै महत्वपूर्ण तेल आपूर्ति मार्ग मानिने हर्मुज जलमार्ग व्यापारिक जहाजका लागि पुनः खुला गर्ने घोषणा गरेको छ ।
गत फेब्रुअरी २८ मा अमेरिका र इजरायलले इरानमाथि आक्रमण गरेपछि तेहरानले उक्त जलमार्ग बन्द गराएको थियो । इरानी विदेशमन्त्री अब्बास अराघचीले शुक्रबार सामाजिक सञ्जाल ‘एक्स’ मार्फत लेबनान र इजरायलबीच भएको १० दिने युद्धविरामलाई मध्यनजर गर्दै बाँकी अवधिका लागि मार्ग खुला गरिएको जानकारी दिएका हुन् ।
तर, जहाजहरूले इरानी बन्दरगाह तथा समुद्री निकायले तोकेको ‘समन्वयित सुरक्षित मार्ग’ मात्र प्रयोग गर्नुपर्ने सर्त राखिएको छ ।
यसैबीच, अमेरिकी राष्ट्रपति डोनाल्ड ट्रम्पले इरानको यस कदमलाई विश्वका लागि सकारात्मक संकेत भएको बताएका छन् । तर, दुई देशबीच पूर्ण शान्ति सम्झौता नभएसम्म इरानी बन्दरगाहमाथिको अमेरिकी नौसैनिक घेराबन्दी नहट्ने उनले स्पष्ट पारेका छन् ।
अमेरिका र इरानबीचको वर्तमान युद्धविराम आगामी अप्रिल २२ मा सकिने बताइएको छ । इरानले मार्ग खुला गरेको दाबी गरे पनि अन्तर्राष्ट्रिय समुद्री निकायहरूले तत्काल जहाज सञ्चालन गर्न अझै जोखिम रहेको जनाएका छन् । जहाज ट्र्याकिङ तथ्यांकअनुसार उक्त क्षेत्रमा हाल जहाजको आवागमन निकै कम रहेको छ ।
इरानी सैन्य अधिकारीका अनुसार व्यापारिक जहाजलाई अनुमति दिइए पनि विदेशी सैन्य जहाजहरूलाई भने अझै उक्त मार्ग प्रयोग गर्न निषेध गरिएको छ ।
प्रतिक्रिया