काठमाडौं । राष्ट्रिय स्वतन्त्र पार्टी (रास्वपा)ले सांगठनिक तथा संरचनागत सुधारका विषयमा छलफल गर्न आज सचिवालय बैठक आह्वान गरेको छ । सभापति रवि लामिछानेले दिउँसो ३ः३० बजे पार्टी केन्द्रीय कार्यालयमा बस्ने गरी बैठक बोलाएका हुन् ।
बैठकमा पार्टीको आगामी महाधिवेशन र जिल्ला अधिवेशनको तयारीबारे केन्द्रीत छलफल हुने जनाइएको छ । प्रस्तावित कार्यसूची अनुसार ‘जिल्ला अधिवेशन कार्यविधि-२०८३’ पारित गर्ने र ‘महाधिवेशन कार्यविधि मस्यौदा समिति’ गठन गर्ने विषय मुख्य एजेन्डामा रहेका छन् ।
यस्तै, केन्द्रीय आयोग तथा सल्लाहकार परिषद् गठन, संघीय नेतृत्व मञ्च विस्तार तथा विभिन्न विभागमा मनोनयन गर्ने विषयमा पनि बैठकमा छलफल हुनेछ । साथै बैंक खाता सञ्चालनसम्बन्धी नयाँ व्यवस्था र विभिन्न परियोजनाका लागि विज्ञ आह्वान गर्ने विषय पनि समावेश गरिएको छ ।
बैठकले प्रतिनिधिसभा सदस्यहरूको संगठनात्मक जिम्मेवारी बाँडफाँट गर्ने तयारी गरेको छ । यसबाहेक आगामी केन्द्रीय समिति बैठकको तयारी, संसदीय दलका लागि प्राविधिक सहयोग तथा लेवी व्यवस्थापनका विषयमा समेत निर्णय लिने बताइएको छ ।
प्रतिक्रिया