काठमाडौं । अध्यागमन विभागले त्रिभुवन अन्तर्राष्ट्रिय विमानस्थलस्थित अध्यागमन कार्यालयका दुई अधिकृतलाई जिम्मेवारीबाट हटाएको छ। उनीहरूले पासपोर्टमा ‘काम गर्न निषेध’ भन्ने टिप्पणी लेखेको विषय सार्वजनिक भएपछि विभागले यस्तो निर्णय गरेको हो।
सोमबार जारी विज्ञप्तिमा विभागले नेपाली नागरिकलाई कुनै सर्त राखेर प्रस्थान अनुमति दिने नीति वा निर्णय नभएको स्पष्ट पारेको छ। प्रचलित कानुन र विभागीय निर्णय विपरीत गैरकानुनी अभ्यास गरेको भन्दै ती दुई अधिकृतलाई हटाई उनीहरूमाथि आवश्यक छानबिन अघि बढाइएको जनाइएको छ।
यसैबीच, युनाइटेड अरब इमिरेट्स (यूएई) जान लागेका नेपाली नागरिकको पासपोर्टमा ‘२०२६ जुन १० सम्म काम गर्न निषेध’ उल्लेख गरिएको घटनाबारे अनुसन्धान गर्न छानबिन समिति पनि गठन गरिएको छ। विभागका अनुसार वैशाख ३ गतेको निर्णयअनुसार उक्त समिति बनाइएको हो।
भिजिट भिसामा यूएई जान लागेका नेपालीहरूको पासपोर्टमा यस्तो टिप्पणी लेखिएको विषय बाहिरिएपछि विभागले छानबिन प्रक्रिया सुरु गरेको जनाएको छ।
प्रतिक्रिया