काठमाडौं । काठमाडौं महानगरपालिकाकी कार्यवाहक मेयर सुनिता डंगोलले सुकुम्बासी बस्ती हटाएर खाली गराइएको सार्वजनिक जग्गाको संरक्षणका लागि तत्काल काम अघि बढाउन निर्देशन दिएकी छन्।
थापाथलीस्थित बागमती नदी किनारामा खाली गरिएको क्षेत्रको स्थलगत निरीक्षण गर्दै उनले प्रमुख प्रशासकीय अधिकृत सरोज गरागाईंलाई सुरक्षा र संरक्षणका उपाय तत्काल लागू गर्न निर्देशन दिएकी हुन्।
उनले हाल खाली गरिएका तथा आगामी दिनमा खाली गराइने सार्वजनिक जग्गामा तारबार लगाउन एकीकृत बागमती सभ्यता विकास समिति लगायत सम्बन्धित निकायसँग समन्वय गर्न र सार्वजनिक निर्माण विभागमार्फत काम सुरु गर्न आग्रह गरेकी छन्।
यसैबीच, कार्यवाहक मेयर डंगोलले इचङ्गुनारायणस्थित कोलोनी क्षेत्रको समेत निरीक्षण गरेकी थिइन्। महानगरले अव्यवस्थित बस्तीमा बसोबास गर्दै आएका वास्तविक भूमिहीन परिवारलाई त्यहाँ स्थानान्तरण गर्ने योजना बनाएको जनाएको छ।
महानगरले नदी किनार र सार्वजनिक पर्ती जग्गामा बनाइएका अनधिकृत संरचना हटाउने अभियानअन्तर्गत थापाथली क्षेत्रको बस्ती १२ वैशाखमै खाली गराइसकेको छ।
प्रतिक्रिया