काठमाडौं । हाल नेपालमा पश्चिमी तथा स्थानीय वायुको प्रभावसँगै पूर्वी भूभाग नजिक तल्लो वायुमण्डलमा बनेको न्यूनचापीय प्रणाली सक्रिय हुँदा देशभर मौसम बदली भएको छ ।
मौसम पूर्वानुमान महाशाखाका अनुसार कोशी, मधेस, बागमती र गण्डकी प्रदेशलगायत देशका अधिकांश हिमाली तथा पहाडी क्षेत्रमा बाक्लो बादल लागेको छ भने अन्य स्थानमा आंशिक बदली रहेको छ । गण्डकी प्रदेशका केही स्थान तथा बागमती र कर्णाली प्रदेशका एक-दुई स्थानमा मेघगर्जन र चट्याङसहित मध्यम वर्षा भइरहेको छ ।
आज दिउँसो कोशी, मधेस, बागमती, गण्डकी र लुम्बिनी प्रदेशका धेरै स्थान तथा कर्णाली र सुदूरपश्चिम प्रदेशका केही स्थानमा मेघगर्जन र चट्याङसहित मध्यम वर्षा तथा हिमाली क्षेत्रमा हिमपातको सम्भावना रहेको छ । विशेषगरी कोशी प्रदेशको पहाडी भूभागका एक-दुई स्थानमा भारी वर्षा हुन सक्ने महाशाखाले जनाएको छ ।
यसका साथै तराई क्षेत्रका केही स्थानमा हुरीबतास चल्ने सम्भावना पनि रहेकाले सतर्कता अपनाउन आग्रह गरिएको छ ।
आज राति पनि देशका अधिकांश पहाडी तथा हिमाली क्षेत्रमा बदली रहने र कोशी, मधेस, बागमती र गण्डकी प्रदेशका धेरै स्थानमा वर्षा जारी रहने अनुमान गरिएको छ । लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रका केही स्थानमा समेत मेघगर्जनसहित वर्षा हुने सम्भावना रहेको छ ।
महाशाखाले विशेषगरी कोशी र गण्डकी प्रदेशका पहाडी भू-भागमा भारी वर्षाको सम्भावना रहेकाले सतर्क रहन तथा आवश्यक सावधानी अपनाउन सर्वसाधारणलाई अनुरोध गरेको छ ।
प्रतिक्रिया