काठमाडौं । राष्ट्रपति रामचन्द्र पौडेलले सार्वजनिक खरिदसम्बन्धी कानुनी व्यवस्थामा संशोधन गर्दै ‘सार्वजनिक खरिद (दोस्रो संशोधन) अध्यादेश, २०८३’ जारी गरेका छन्।
मन्त्रिपरिषद्को सिफारिसमा संविधानको धारा ११४ को उपधारा (१) बमोजिम उक्त अध्यादेश जारी गरिएको राष्ट्रपति कार्यालयले जनाएको छ । राष्ट्रपति कार्यालयका प्रवक्ता रितेशकुमार शाक्यले विज्ञप्तिमार्फत् अध्यादेश जारी भएको जानकारी दिएका छन् ।
विज्ञप्तिअनुसार २०८३ साल वैशाख १७ गते जारी गरिएको उक्त अध्यादेशले सार्वजनिक खरिद प्रक्रियामा आवश्यक सुधार तथा समयानुकूल व्यवस्थापन गर्ने उद्देश्य राखेको बुझिएको छ।
यसैबीच, राष्ट्रपति पौडेलले आजै सहकारीसम्बन्धी अर्को अध्यादेशसमेत जारी गरिसकेका छन्। सरकारले ल्याएका ६ वटा अध्यादेशहरू मध्ये अहिलेसम्म दुई वटा अध्यादेश जारी भएको छ । राष्ट्रपतिले संवैधानिक परिषद् सम्बन्धी अध्यादेशबारे आजै कानूनविद्हरुसँग परामर्श गरेका छन् । उनले आफुले दुईपटक फिर्ता पठाएको विषयलाई अहिले कसरी प्रमाणिकरण गर्ने भन्ने विषयमा कानूनविद्हरुको सुझाव लिएका थिए ।
प्रतिक्रिया