नयाँ दिल्ली । भारतले लिपुलेक पासलाई कैलाश मानसरोवर यात्राको ऐतिहासिक मार्ग भएको दाबी गर्दै यस विषयमा नेपालले उठाएका सीमासम्बन्धी दाबीहरू अस्वीकार गरेको छ ।
नेपालको परराष्ट्र मन्त्रालयले सार्वजनिक गरेको धारणा सम्बन्धी प्रश्नमा प्रतिक्रिया दिँदै भारतीय विदेश मन्त्रालयका प्रवक्ता रणधीर जैसवालले आइतबार भारतको अडान स्पष्ट र सुसंगत रहेको बताएका हुन् ।
उनका अनुसार लिपुलेक पास सन् १९५४ देखि नै कैलाश मानसरोवर यात्राका लागि स्थापित मार्ग हो र दशकौँदेखि सोही मार्ग प्रयोग हुँदै आएको छ । “यो कुनै नयाँ विकासक्रम होइन,” उनले बताएका छन् ।
भारतले नेपालको दाबीलाई ऐतिहासिक तथ्य र प्रमाणमा आधारित नभएको जिकिर गर्दै एकपक्षीय रूपमा गरिएका क्षेत्रीय दाबी दीगो नहुने उल्लेख गरेको छ ।
यद्यपि भारतले नेपालसँगका सबै द्विपक्षीय विषयमा रचनात्मक संवादका लागि तयार रहेको जनाउँदै बाँकी सीमा विवादहरू पनि वार्ता र कूटनीतिक माध्यमबाट समाधान गर्न खुला रहेको जनाएको छ ।
प्रतिक्रिया