रोशी खोलामा फसेका ५ माइक्रोबससहित ८९ यात्रुको सकुशल उद्धार

काभ्रेपलाञ्चोक । अविरल वर्षापछि पानीको बहाव बढ्दा रोशी खोलामा फसेका पाँच वटा माइक्रोबस र तिनमा सवार ८९ यात्रुको सकुशल उद्धार गरिएको छ । उद्धार कार्य नेपाली सेना, नेपाल प्रहरी र सशस्त्र प्रहरी बल नेपालको संयुक्त टोलीले गरेको हो ।

जिल्ला प्रहरी कार्यालय काभ्रेपलाञ्चोकका डीएसपी रविन विष्टले उद्धार सफलतापूर्वक सम्पन्न भएको जानकारी दिएका छन् ।

सोमबार रोशी गाउँपालिका-९ अन्तर्गत लास्कोट र चार सय बेशी क्षेत्रबीच पर्ने नदीको दुई धारबीच माइक्रोबसहरू अड्किएका थिए । तीव्र बहावका कारण यात्रुहरू जोखिममा परेपछि सुरक्षाकर्मीले लामो प्रयासपछि उद्धार अभियान सञ्चालन गरेका थिए ।

डीएसपी विष्टका अनुसार राति करिब १ बजे सबै यात्रु र सवारी साधनको उद्धार गरी सुरक्षित रूपमा गन्तव्यतर्फ पठाइएको हो ।