माइतीघरमा भूमिहीन सुकुम्बासीको प्रदर्शन

काठमाडौं । भूमिहीन, सुकुम्बासी तथा अव्यवस्थित बसोबासीहरूले जबरजस्ती उठीबास र डोजर अभियानको विरोध गर्दै राजधानीमा आन्दोलन तीव्र पारेका छन् ।

देशका विभिन्न जिल्लाबाट आएका उनीहरू माइतीघर मण्डलामा भेला भएर सरकारसँग उचित व्यवस्थापन र आवासको सुनिश्चितता माग गरेका हुन् ।

प्रदर्शनकारीहरूले वैकल्पिक व्यवस्था नगरी बस्ती हटाइनु अन्यायपूर्ण भएको बताएका छन् । उनीहरूले चुनावका बेला गरिएका प्रतिबद्धता सरकारले बिर्सिएको आरोप समेत लगाएका छन् । आन्दोलनमा सहभागीहरूको भनाइ छ— “व्यवस्थापन बिना विस्थापन स्वीकार्य हुँदैन ।”

राष्ट्रिय भूमि अधिकार मञ्च नेपालको अगुवाइमा ७ प्रदेशका २० जिल्लाबाट प्रतिनिधिमूलक सहभागिता रहेको आन्दोलनमा भूमिहीनहरूले “डोजर आतंक बन्द गर”, “भूमिहीनलाई व्यवस्थापन गर” लगायतका नाराबाजी गरेका थिए ।

यसैबीच, मञ्चले मंगलबार राष्ट्रिय स्वतन्त्र पार्टीको कार्यालय पुगेर भूमि तथा आवास अधिकार सुनिश्चित गर्न १२ बुँदे मागपत्र बुझाएको छ । मञ्चका अध्यक्ष ल्यामबहादुर दर्जीले भूमिहीन, दलित र अव्यवस्थित बसोबासीलाई विस्थापन नगरी संवादमार्फत समाधान खोज्न सरकारसँग आग्रह गरेका छन् ।