बुटवल । रुपन्देहीको तिलोत्तमा-१ नयाँमिलस्थित प्यारामाउण्ट बोर्डिङ स्कूलले माध्यमिक शिक्षा परीक्षा (एसईई) २०८२ मा उत्कृष्ट नतिजा ल्याउने विद्यार्थीहरुलाई सम्मान गरेको छ । विद्यालयले एक कार्यक्रम आयोजना गरी उच्च अंकसहित एसईई उत्तीर्ण विद्यार्थीहरुलाई सम्मान गर्दै बधाई तथा शुभकामना प्रदान गरेको हो ।
यस वर्ष विद्यालयबाट ६ जना विद्यार्थीले ४ जीपीए प्राप्त गरेका छन् भने विद्यालयका शतप्रतिशत विद्यार्थी उत्तीर्ण भएका छन् । विद्यालयबाट ४७ जना विद्यार्थीले ए प्लस, ६३ जनाले ए, ३३ जनाले बी प्लस तथा ६ जनाले बी ग्रेड हासिल गरेका छन् ।
कार्यक्रममा बोल्दै तिलोत्तमा नगरपालिकाका शिक्षा शाखा प्रमुख गंगाराम आचार्यले विद्यालय सफल हुनका लागि उत्कृष्ट नतिजासँगै असल अभ्यास पनि आवश्यक रहने बताए । उनले विद्यार्थीलाई नैतिक शिक्षा, अनुशासन, संस्कार र संस्कृति सिकाउनुपर्नेमा जोड दिँदै प्यारामाउण्टको नतिजाले सबैलाई गौरवान्वित बनाएको उल्लेख गरे ।
विद्यालयका संस्थापक प्राचार्य डा. दामोदर भुसालले विद्यालयको गौरवपूर्ण शैक्षिक इतिहासलाई यसपटकको नतिजाले अझ सशक्त बनाएको बताए । उनले विद्यालयले किताबी ज्ञानसँगै रचनात्मक क्षमता र सीप विकासमा पनि विशेष ध्यान दिँदै आएको जानकारी दिए ।
कार्यक्रममा विद्यालयका अध्यक्ष पूर्णप्रसाद सापकोटा, अभिभावक संघ रुपन्देहीका अध्यक्ष लोकनाथ ज्ञवाली, विद्यालयका उपप्राचार्य लिलाधर किरात, शिक्षक दिवाकर पन्थीलगायतले मन्तव्य व्यक्त गरेका थिए ।
त्यस अवसरमा ४ जीपीए ल्याउने विद्यार्थी आयुषा भुसाल र आयुस्मा पाण्डेलगायत विद्यार्थी तथा अभिभावक शिव शर्माले पनि आफ्ना अनुभव साझा गरेका थिए ।
हाल विद्यालयमा करिब २ हजार ६०० विद्यार्थी अध्ययनरत छन् ।
प्रतिक्रिया