बुटवल । सार्वजनिक जग्गा संरक्षणका नाममा वैकल्पिक व्यवस्था नगरी सरकारले वर्षौंदेखि बसोबास गर्दै आएका बस्तीमा डोजर चलाएको भन्दै देशभरका भूमिहीन सुकुम्बासी तथा अव्यवस्थित बसोबासीले आइतबार बुटवलमा प्रदर्शन गरेका छन् ।
नेपाल भूमिहीन सुकुम्बासी तथा अव्यवस्थित बसोबासी संघर्ष समिति रुपन्देहीको आयोजनामा भएको प्रदर्शनमा विभिन्न जिल्लाबाट हजारौँको सहभागिता रहेको संघर्ष समितिका रुपन्देही संयोजक खगेन्द्र पौडेलले जानकारी दिए ।
प्रदर्शनकारीहरूले सरकारले वैकल्पिक व्यवस्थाबिना गरिब तथा अव्यवस्थित बसोबासीका घरटहरा हटाएर उठिबास लगाउने काम गरेको आरोप लगाएका छन् ।
उनीहरूले ‘डोजर आतंक बन्द गर’, ‘अव्यवस्थित बसोबासीलाई व्यवस्थित गर’, ‘गाँस, बासको सुनिश्चित गर’, ‘डोजर होइन समाधान दे’, ‘सुकुम्बासी हुनु रहर होइन, बाध्यता हो’ लगायतका नारासहित सरकारविरुद्ध प्रदर्शन गरेका थिए ।
प्रदर्शनका क्रममा सहभागीहरूले भूमिहीन तथा अव्यवस्थित बसोबासीको दीर्घकालीन समाधान गर्न सरकारसँग माग गरेका छन् ।
फोटो फिचर
प्रतिक्रिया