काठमाडौं । सर्वोच्च अदालतको प्रधानन्यायाधीश पदमा डा. मनोजकुमार शर्माको नाम सर्वसम्मत रूपमा अनुमोदन भएको छ । संवैधानिक परिषद्बाट सिफारिस भएका शर्माको संसदीय सुनुवाइ सम्पन्न भएसँगै उनको नाम अनुमोदन गरिएको हो ।
यससँगै शर्माले मंगलबार नै प्रधानन्यायाधीश पदको नियुक्ति र शपथ ग्रहण गर्ने भएका छन् । बुधबारदेखि उनले सर्वोच्च अदालतमा दैनिक इजलास र पेशी तोक्ने जिम्मेवारी सम्हाल्नेछन् ।
मंगलबार सिंहदरबारमा बसेको संसदीय सुनुवाइ समितिको बैठकमा शर्माविरुद्ध परेका १६ वटा उजुरीमाथि छलफल गरिएको थियो । समितिका सदस्यहरूलाई उजुरी अध्ययनका लागि वितरण गरिएपछि शर्मा स्वयं समितिमा उपस्थित भएर उजुरीबारे स्पष्टीकरण दिएका थिए ।
समितिमा उठाइएका सबै प्रश्नको जवाफ दिएपछि उनको नाम अनुमोदन गरिएको हो । शर्माविरुद्ध संसदीय सुनुवाइ समितिमा १६ वटा उजुरी दर्ता भएका थिए । उजुरीकर्तासँग पनि समितिले मंगलबार नै छलफल गरेको थियो ।
वरिष्ठताका आधारमा चौथो क्रममा रहेका शर्मालाई प्रधानन्यायाधीश बनाउन प्रधानमन्त्री वालेन्द्र शाहले संवैधानिक परिषद्मा जोड दिएको बताइएको छ । परिषद् बैठकमा प्रधानमन्त्री शाहले शर्मा मुद्दा फर्छ्योटमा सक्षम र प्रभावकारी रहेको तर्क प्रस्तुत गरेका थिए ।
यसअघि सोमबार कायममुकायम प्रधानन्यायाधीश सपना प्रधान मल्लले शर्माविरुद्ध परेको रिट दर्ता गर्न आदेश दिएकी थिइन् । तर, उक्त आदेशपछि सर्वोच्च अदालत प्रशासनका मुख्य रजिस्ट्रारसहित कर्मचारी सम्पर्कविहीन बनेको विषयले विवाद उत्पन्न भएको थियो । यही विवादबीच शर्मा अब सर्वोच्च अदालतको नेतृत्व सम्हाल्न लागेका हुन् ।
प्रतिक्रिया