रास्वपा सभापति लामिछानेले आज कोसी र मधेस प्रदेशका सांसदसँग छलफल गर्ने

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आज कोसी र मधेस प्रदेशका सांसदहरूसँग छलफल गर्ने भएका छन् । काठमाडौंमा उपलब्ध कोसी र मधेस प्रदेशका सांसदहरूसँग पार्टीको समसामयिक अवस्था, संसदीय गतिविधि तथा आगामी रणनीतिका विषयमा छलफल गर्न लागिएको हो ।

पार्टी प्रवक्ता मनिष झाले सांसदहरूबाट प्राप्त सल्लाह-सुझावका आधारमा सभापति लामिछानेले छलफल कार्यक्रम तय गरेको जानकारी दिए । उनका अनुसार कोसी प्रदेशका सांसदहरूसँग बिहान ११ बजेदेखि दिउँसो १ बजेसम्म तथा मधेस प्रदेशका सांसदहरूसँग दिउँसो १ः३० बजेदेखि ३ः३० बजेसम्म सिंहदरबारस्थित संसदीय दलको कार्यालयमा छलफल हुनेछ ।

प्रवक्ता झाले बाँकी प्रदेशका सांसदहरूसँग पनि क्रमशः अन्य दिनमा छलफल कार्यक्रम आयोजना गरिने बताए । रास्वपाले पछिल्लो समय पार्टी संगठन सुदृढीकरण, संसदीय भूमिकाको प्रभावकारिता तथा आगामी राजनीतिक रणनीतिका विषयमा आन्तरिक छलफललाई तीव्र बनाउँदै आएको छ ।