पोखरा । पोखरा महानगरपालिकाले फिर्केखोलाको खोलाघरभित्र निर्माण गरिएका संरचना हटाउन आइतबारदेखि डोजर चलाएको छ । वर्षौंदेखि विवाद र राजनीतिक मुद्दाका रूपमा रहेको फिर्केखोला अतिक्रमण हटाएर करिडोर निर्माण गर्ने उद्देश्यसहित महानगरले अभियान थालेको हो ।
पोखरा महानगरपालिकाका प्रमुख धनराज आचार्य तथा सम्बन्धित वडाध्यक्षहरूको नेतृत्वमा बिहान १० बजेदेखि फिर्केखोलाका तीन स्थानबाट एकसाथ डोजर परिचालन गरिएको हो ।
पहिलो चरणमा जिरोकिलोमिटर र सिर्जना चोकबीच फिर्केमाथि बनेका संरचना हटाउन सुरु गरिएको छ । उक्त क्षेत्रमा रहेको लायन्स भवनबाट भत्काउने काम सुरु गरी वडा नं. ६ तर्फ डोजर अगाडि बढाइएको महानगरले जनाएको छ ।
त्यसैगरी अर्को डोजरले वडा नं. २ र १८ को सिमाना अँधेरीकुनादेखि संरचना हटाउन सुरु गर्दै वडा नं. ४ तर्फ अघि बढेको छ । अर्को टोलीले वडा नं. ४ र ५ को सिमाना फिर्केपुलस्थित बूढानीलकण्ठ मन्दिर क्षेत्रबाट संरचना हटाउँदै वडा नं. ५ र ८ तर्फ अभियान सञ्चालन गरेको छ ।
महानगरपालिकाले २०८० साल असारमा गरिएको फिर्केखोला नापजाँच प्रतिवेदनका आधारमा खोलाघरभित्र निर्माण भएका सबै प्रकारका स्थायी तथा अस्थायी संरचना हटाउन थालेको जनाएको छ ।
प्रतिवेदनअनुसार फिर्केखोलाको खोलाघरभित्र १६० वटा संरचना निर्माण गरिएको पाइएको छ । तीमध्ये सरकारी कार्यालय, प्रदेश प्रहरी कार्यालय, समाजघरदेखि निजी घरटहरासम्म रहेका छन् ।
महानगरपालिकाले जेठ ३ गते सार्वजनिक सूचना जारी गर्दै सम्पूर्ण संरचना जेठ ९ गतेभित्र आफैं हटाउन आग्रह गरेको थियो । निर्धारित समयसीमा सकिएपछि महानगरले डोजर परिचालन गरेर अतिक्रमित संरचना हटाउने अभियान सुरु गरेको हो ।
महानगरले डोजर चलाउने सूचना जारी गरेसँगै फिर्केखोलाभित्र रहेका केही संस्था तथा स्थानीयले भने आफ्ना संरचना आफैं हटाउन थालेका थिए । फोटोग्राफर संघ, लायन्स क्लबलगायत संस्थाले यसअघि नै भवन तथा सामग्री खाली गरिसकेका छन् ।
प्रतिक्रिया