काठमाडौं । दक्षिण एसियाली फुटबल महासङ्घ (साफ) को आयोजनामा हुने साफ महिला च्याम्पियनसिप आजदेखि भारतमा सुरु हुँदैछ । प्रतियोगिताको उद्घाटन खेलमा नेपालले आज भुटानसँग प्रतिस्पर्धा गर्दैछ । नेपाली समयअनुसार खेल दिउँसो ४ः४५ बजे गोवास्थित फतोरदा रंगशालामा सुरु हुनेछ ।
त्यसैगरी आजै हुने दोस्रो खेलमा आयोजक भारतले माल्दिभ्ससँग साँझ ७ः४५ बजे प्रतिस्पर्धा गर्नेछ । साफ महिला च्याम्पियनसिप जेठ २३ गतेसम्म सञ्चालन हुनेछ । प्रतियोगितामा नेपालसहित भुटान, भारत, माल्दिभ्स, श्रीलंका र बंगलादेश सहभागी रहेका छन् ।
प्रतियोगितामा समूह ‘ए’ मा नेपाल, भुटान र श्रीलंका रहेका छन् भने समूह ‘बी’ मा भारत, माल्दिभ्स र बंगलादेश रहेका छन् । नेपालले आफ्नो दोस्रो खेल जेठ १७ गते श्रीलंकाविरुद्ध खेल्ने तालिका रहेको छ । प्रतियोगिताको सेमिफाइनल जेठ २० गते तथा फाइनल खेल जेठ २३ गते हुने आयोजकले जनाएको छ ।
साफ च्याम्पियनसिपका लागि घोषित नेपाली टोलीको कप्तानी गोलकिपर अञ्जिला तुम्बापो सुब्बाले गर्नेछिन् । टोलीमा अन्य गोलकिपरका रूपमा अञ्जना राना मगर र उषा नाथ रहेका छन् ।
डिफेन्डरमा पूजा राना, गीता राना, विमला बिके, हिराकुमारी भुजेल, प्रतिश्या चौधरी, समीक्षा घिमिरे, निशा ठोकर र सबिना चौधरी रहेका छन् । मिडफिल्डरमा रेणुका नगरकोटी, दिपा शाही, प्रीति राई, सारु लिम्बु, बिर्शना चौधरी, अनिता बस्नेत, अनिता लाम्जेल र अनिता केसी रहेका छन् ।
त्यस्तै फरवार्डमा रश्मि घिसिङ, रेखा पौडेल, पूर्णिमा राई र मिना देउवा रहेका छन् । यसपटक नेपाल उपाधि जित्ने लक्ष्यसहित मैदान उत्रिएको छ । नेपाली महिला टोली साफ प्रतियोगितामा लगातार उत्कृष्ट प्रदर्शन गर्दै आए पनि हालसम्म उपाधिबाट भने वञ्चित रहँदै आएको छ ।
प्रतिक्रिया