जिज्ञासुको ‘अग्निस्पन्दन’ विमोचन र ‘विवश आमा’ गीत सार्वजनिक

नेपालगन्ज । बाँकेमा रहेर साहित्य साधना गरिरहेकी साहित्यकार कल्पना पौडेल जिज्ञासुको सातौं कृति कविता संग्रह ‘अग्निस्पन्दन’ को विमोचन तथा ‘विवस आमा’ गीत सार्वजनिक गरिएको छ । कल्पना फाउन्डेसन नेपालको आयोजनामा आयोजित पुस्तक विमोचन तथा गीत सार्वजनिक कार्यक्रममा प्राध्यापक डा कृष्ण प्रसाद घिमिरे, कथाकार सनत रेग्मी, साहित्यकार हरि तिमिल्सिना, महानन्द ढकाल र लेखक नरेन्द्र जंग पिटरले संयुक्तरुपमा पुस्तक विमोचन गरे ।

साहित्यका विविध विधामा कलम चलाउँदै आएकी जिज्ञासुको सातौं कृति अग्निस्पन्दन ऐरावती प्रकाशन काठमाडौँले प्रकाशित गरि बजारमा ल्याएको हो । त्यसैगरि विवस आमा बोलको गीतमा जिज्ञासुको शब्द रचनालाई रियाज शिवाकोटीको संगीतमा चर्चित गायिका बेनिसा पौडेलले स्वर दिएकी छन। राजिव शाह स्टुडियो र रियाज रेकर्डिङ सेन्टरले उत्पादन गरि एल्बम बजारमा ल्याएको हो । आमाको विवसतालाई मुख्य विषय बनाइएर लेखिएको गीतका शव्दहरूले कार्यक्रममा प्रसारित गर्दा उपस्थित सबैलाई भाबुक बनाएको थियो।

कार्यक्रममा बोल्ने वक्ताहरुले जिज्ञासुकोले बेरोजगारी र गरिबीका कारण साना सन्तानलाई घरमा छोडेर विदेशिन बाध्य भएका आफु लगायत लाखौं आमाहरुको भावनाहरुलाई शब्दहरू समेटेर गीतको माध्यमबाट राष्ट्र र समाजलाई सन्देश दिन सफल भएको टिप्पणी गरेका थिए ।

अग्निस्पन्दन कविता संग्रह भित्र ५२ वटा कविताहरू समेटेर तयार पारिएको छ ।अग्नि स्पन्दन संग्रह भित्रका अघिकांश कविताहरुमा नारीबाद र प्रगतिशील चेत मुखरित भएकोले समाजमा रहेको अन्धविश्वास,रुढिबादी चिन्तन, अन्याय, अत्याचार, शोषण दमन, नारी हिँसाको बिरुद्धमा खरो आवाज मात्र उठाएकी छैनन् ,विद्रोहबाट समस्याको समाधान खोजेकी छन । जेन्जी र जेन्जी आन्दोलनमा बगेको रगत र प्रवासी नेपालीहरूको जन्मभूमिप्रतिको अगाध स्नेह, शिक्षक,अभिभावक र विद्यार्थीको भुमिका र राष्ट्र प्रतिको मायालाई समेत समेट्न सफल कविता सङ्ग्रह पठनिय रहेको वक्ताहरुको भनाई थियो ।

कार्यक्रममा अग्निस्पन्दन कविता सङ्ग्रहमा रहेका मन छुने कविताहरूलाई साहित्यकारहरु सुमित्रा न्यौपाने, विष्णु पादुका, मिना बराल, ममता रावल, महानन्द ढकाल, नरेन्द्र जङ पिटर, प्रा डा कृष्ण प्रसाद धिमिरेलगायतले वाचन गरेका थिए ।

फाउन्डेसनका सचिव लेखप्रसाद प्याकुरेलले सञ्चालन गरेको कार्यक्रममा बोल्दै फाउन्डेसन कि अध्यक्ष जिज्ञासुले आफूले समाजमा रहेका विभिन्न विषयवस्तुहरू मध्ये विशेषगरी दुःखी गरिब शोषित पीडित र महिला हरूका विषयवस्तुहरू समेटेर गजल, मुक्तक, नीतिकथा, कथा लघुकथा र कविताको माध्यमबाट समाज रूपान्तरणको लागि सन्देश दिने ढङ्गबाट लेख्दै आएको र यो अग्निस्पन्द कविता संग्रह पनि त्यसैको निरन्तरता स्वरूप सातौं कृति भएतापनि कवितातर्फ पहिलो कृति भएकोले यसभन्दा पहिलाका कृतिहरूले जस्तै पाठकहरूको मन जित्न सफल हुने कुरामा विश्वास व्यक्त गरिन् । सहभागीहरुलाई फाउण्डेसनका उपाध्यक्ष ऋषिराम सापकोटाले स्वागत गरेका थिए ।