देशभर आंशिकदेखि सामान्य बदली, केही स्थानमा वर्षा र चट्याङको सम्भावना

काठमाडौं । आज देशका अधिकांश स्थानको मौसम सामान्यतया बदली रहने भएको छ । जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार देशको हिमाली तथा पहाडी भू-भागमा साधारणतया बदली रहनेछ भने तराई क्षेत्रका अधिकांश स्थानमा आंशिक बदली रहने सम्भावना रहेको छ ।

महाशाखाका अनुसार आज देशका हिमाली र पहाडी भू-भागका थोरै स्थानमा तथा लुम्बिनी र सुदूरपश्चिम प्रदेशका तराई क्षेत्रका एक-दुई स्थानमा मेघगर्जन र चट्याङसहित मध्यम वर्षा हुन सक्ने अनुमान गरिएको छ ।

यस्तै, मधेश, कोशी, बागमती र गण्डकी प्रदेशका तराई क्षेत्रमा अत्यधिक गर्मी रहने तथा तातो दिनको अवस्था कायम रहने सम्भावना रहेको मौसमविद्हरूले बताएका छन् । त्यस क्षेत्रका नागरिकलाई अत्यधिक गर्मीबाट बच्न आवश्यक सतर्कता अपनाउन आग्रह गरिएको छ ।

आज राति भने देशको हिमाली भू-भागमा साधारणतया बदली रहने, पहाडी भू-भागमा आंशिक बदली रहने तथा तराई क्षेत्र मुख्यतया सफा रहने महाशाखाले जनाएको छ ।

रातिको समयमा कोशी प्रदेशका हिमाली तथा पहाडी क्षेत्रका एक-दुई स्थानका साथै बागमती, गण्डकी र कर्णाली प्रदेशका हिमाली भू-भागका केही स्थानमा हल्का वर्षा वा हिमपातको सम्भावना रहेको मौसम पूर्वानुमान महाशाखाले जनाएको छ ।