काठमाडौं । नेकपा (एमाले) अध्यक्ष केपी शर्मा ओलीले सरकारप्रति कडा असन्तुष्टि व्यक्त गर्दै आफ्नो सम्पत्ति नै आगो लगाएर खरानी बनाइएको अवस्थामा सम्पत्ति विवरण मागिएको भन्दै आक्रोश पोखेका छन् ।
निर्वाचनपछि पहिलो पटक सार्वजनिक कार्यक्रममा बोल्दै अध्यक्ष ओलीले आफूले निर्वाचनबाट बनेको सरकारलाई स्वीकार गरे पनि सरकारले निरन्तर आफूविरुद्ध प्रहार गरिरहेको आरोप लगाए ।
उनले कसैको अवैध वा अकुत सम्पत्ति भए कानुनअनुसार छानबिन गर्न आग्रह गर्दै आफ्नो सम्पत्तिको विषयमा भने व्यंग्यात्मक शैलीमा प्रतिक्रिया दिए ।
“कसैको अकुत सम्पत्ति देख्यो भने छानबिन गरोस्। आगो लगाएर खरानी बनाएको ठाउँमा मेरो सम्पत्ति विवरण मागिन्छ ? सम्पत्ति विवरणमा खरानी भर्दिने मैले ?” ओलीले भने, “आगो लगाएर पुगेन, फेरि सम्पत्ति विवरण रे ! खरानी छ, उठाएर लैजा सरकार । के को सम्पत्ति विवरण ?”
ओलीले सरकारको व्यवहारप्रति असन्तुष्टि जनाउँदै आफूलाई लक्षित गरी विभिन्न प्रकारका आरोप र प्रहार भइरहेको दाबी गरे । उनका अनुसार लोकतान्त्रिक प्रक्रियाबाट बनेको सरकारलाई सम्मान गरे पनि सरकारबाट निष्पक्ष व्यवहार नपाएको महसुस भएको छ ।
उनको यो अभिव्यक्ति पछिल्लो राजनीतिक घटनाक्रम र सरकारसँगको बढ्दो राजनीतिक टकरावको सन्दर्भमा आएको रूपमा हेरिएको छ ।
प्रतिक्रिया