काठमाडौं । सगरमाथा क्षेत्रमा ६ दिनदेखि बेपत्ता रहेका ओखलढुंगाका पर्वतारोहण गाइड दावा शेर्पा सकुशल फेला परेका छन् । खोजी टोलीले उनलाई आज बिहान खुम्बु आइसफल क्षेत्रमा भेटाएको हो ।
उनी हिमालयन ट्राभर्स एडभेन्चरमा आबद्ध रहेका थिए । खोजीमा खटिएको टोलीका अनुसार दावालाई हिउँमा घिस्रिँदै तल झर्दै गरेको अवस्थामा फेला पारिएको थियो ।
एटके एक्सपिडिसनका एमडी पेम्बा शेर्पाका अनुसार फेला परेपछि उनलाई तत्काल उद्धार गरी आधार शिविरतर्फ लगिएको थियो । त्यसपछि अल्टिच्युड एयरको हेलिकोप्टरमार्फत उपचारका लागि काठमाडौं ल्याइँदैछ ।
फेसबुकमा सार्वजनिक भएका तस्वीरहरूमा उनका हातका औंलामा घाउ देखिएको जनाइएको छ । उनी यही जेठ १५ गते तेस्रो शिविर आसपासबाट सम्पर्कविहीन भएका थिए ।
उनको खोजीका लागि एटके एक्सपिडिसनले आफ्नै खर्चमा अल्टिच्युड एयरको हेलिकोप्टरसहितको उद्धार टोली परिचालन गरेको थियो ।
दावा शेर्पा एक पोलिस नागरिकसँग सगरमाथा आरोहणमा गएका थिए । फर्किने क्रममा उनी सम्पर्कविहीन भएका थिए ।
प्रतिक्रिया