काठमाडौं । नेपाल कम्युनिस्ट पार्टी (नेकपा)का नेता वर्षमान पुनले प्रधानमन्त्री बालेन्द्र शाहले संसदमा दिएको विवादास्पद अभिव्यक्ति सच्याएर प्रतिनिधिसभाको अभिलेखबाट हटाउन माग गरेका छन्।
सोमबार बसेको प्रतिनिधिसभा बैठकमा बोल्दै नेता पुनले प्रधानमन्त्रीको भनाइले अनावश्यक विवाद सिर्जना गरेको उल्लेख गर्दै त्यसलाई संसदीय प्रक्रियाअनुसार सच्याउनुपर्ने धारणा राखे। उनले संसद नियमित रूपमा सञ्चालन हुनुपर्नेमा जोड दिँदै विवादित विषयलाई संवादमार्फत समाधान गर्न आग्रह गरे।
“राजनीतिक दलहरूबीच विभिन्न विषयमा असहमति हुन सक्छन्, तर संसद अवरुद्ध हुनु उचित होइन,” पुनले भने, “प्रधानमन्त्रीको अभिव्यक्तिको विषय सच्याइनुपर्छ र संसद्को रेकर्डबाट हटाइनुपर्छ।”
प्रधानमन्त्री शाहले केही दिनअघि प्रतिनिधिसभामा सांसदहरूसँगको प्रश्नोत्तरका क्रममा नेपालले पनि भारतको केही भूमि अतिक्रमण गरेको आशयको अभिव्यक्ति दिएका थिए। उक्त भनाइ सार्वजनिक भएपछि विपक्षी दलहरूले त्यसको विरोध गर्दै संसदमा निरन्तर अवरोध गर्दै आएका छन्।
प्रतिक्रिया