काठमाडौं । फिफा विश्वकप फुटबल प्रतियोगिता हेर्न अमेरिका हिँडेका अखिल नेपाल फुटबल संघ (एन्फा)का अध्यक्ष पंकजविक्रम नेम्वाङ र महासचिव किरण राईलाई त्रिभुवन अन्तर्राष्ट्रिय विमानस्थलबाट फर्काइएको छ।
उनीहरूलाई अध्यागमन अधिकारीहरूले त्रिभुवन अन्तर्राष्ट्रिय विमानस्थलबाट फर्काइदिएका हुन् । राष्ट्रिय खेलकुद परिषद् (राखेप) को पत्रका आधारमा उनीहरूलाई विदेश जान रोक लगाइएको अध्यागमन विभागले जनाएको छ ।
केही दिनअघि खेलकुद मन्त्रालय र राखेपबाट खेलकुदसम्बन्धी कार्यक्रमका लागि एन्फाका पदाधिकारीहरूलाई विदेश जान नदिन पत्राचार गरेको थियो । नेम्वाङ र राई विदेश यात्रा प्रतिबन्ध सूची (ब्ल्याक लिस्ट)मा राखिएको छ ।
राखेपले एन्फामा भएको भनिएको आर्थिक अनियमिततासम्बन्धी विषयमा छानबिन गरिरहेको छ। सोही छानबिनलाई प्रभावकारी बनाउन राखेपको सिफारिसमा अध्यागमन विभागले गत वैशाखमै एन्फाका अध्यक्ष, महासचिवसहित सबै पदाधिकारीलाई विदेश भ्रमणमा रोक लगाएको थियो।
प्रतिक्रिया