काठमाडौं-तराई फास्ट ट्र्याकमा पिकअप दुर्घटना, दुई जनाको मृत्यु

हेटौंडा । मकवानपुरको भीमफेदी गाउँपालिका-८ बैदमार क्षेत्रमा रहेको काठमाडौं-तराई द्रुतमार्ग (फास्ट ट्र्याक) मा पिकअप भ्यान दुर्घटना हुँदा दुई जनाको मृत्यु भएको छ ।

बुधबार राति करिब साढे १० बजे माण्डु हाइड्रोपावरबाट इपातर्फ जाँदै गरेको फास्ट ट्र्याक आयोजनामा प्रयोग हुने पिकअप भ्यान सडकबाट करिब १०० फिट तल खोलामा खसेर दुर्घटनामा परेको जिल्ला प्रहरी कार्यालय मकवानपुरले जनाएको छ ।

दुर्घटनामा सिन्धुलीको कमलामाई नगरपालिका-९ निवासी ४२ वर्षीय बोधराज बुढाथोकी र बाराको पचरौता नगरपालिका-७ का २१ वर्षीय सूर्य यादव गम्भीर घाइते भएका थिए । बुढाथोकी नेपाली सेनाका पूर्वहवल्दार तथा चालक रहेका थिए भने यादव फास्ट ट्र्याक आयोजनामा इन्जिनियरका रूपमा कार्यरत थिए ।

दुर्घटनाको जानकारी प्राप्त भएपछि नेपाल प्रहरी र नेपाली सेनाको संयुक्त उद्धार टोली घटनास्थलमा पुगेको थियो । टोलीले दुवै जनालाई गम्भीर अवस्थामा उद्धार गरी उपचारका लागि हेटौंडा अस्पताल पठाएको थियो ।

उनीहरूलाई बिहीबार बिहान अस्पताल ल्याइए पनि चिकित्सकले परीक्षणपछि मृत घोषणा गरेका थिए । मृतकहरूको शव हेटौंडा अस्पतालमा राखिएको छ ।

प्रहरीले दुर्घटनाको कारणबारे थप अनुसन्धान भइरहेको जनाएको छ ।