नेपालगन्ज । बाँकेको राप्तीसोनारी गाउँपालिकास्थित कुसुमदेखि अगैयासम्मको राप्ती नदी खण्डलाई जल पर्यटनको गन्तव्यका रुपमा विकास गर्न थालिएको छ । राप्तीसोनारी गाउँपालिकाका अध्यक्ष तप्त पौडेलले जलपर्यटनका रुपमा विकास गर्न त्यस क्षेत्रको वातावरणीय प्रभाव मूल्याङ्कनको काम गरिएको र विस्तृत प्रतिवेदन अन्तिम तयारीमा रहेको जानकारी दिए ।
उनँले गाउँपालिकाको भौगोलिक बनावटले जीप लाइन सञ्चालनदेखि कुसुमदेखि अगैयासम्म करिव १२ किलोमिटर बोटिङ गरेर मनोरञ्जन लिन सकिने बताए । नेपालगन्ज र कोहलपुर बजार जानका लागि सडक सञ्जाल समेत रहेको औल्याउदै अध्यक्ष पौडेलले स्थानीय तहकातर्फबाट पर्यटन प्रर्वद्धनका लागि नीजि क्षेत्रलाई लगानी गर्न आग्रह गरे । उनले भने “यसका लागि कम्तिमा पनि करिव रु. ४ करोडको हाराहारीमा लगानी आवश्यक हुन्छ यसले बाँकेको अर्थतन्त्रमा कायापलट ल्याउन सक्छ ।”
नीतिगत तहबाट समेत पालिका नीजि क्षेत्रलाई सहयोग हुने गरी काम गर्न तयार रहेकोमा जोड दिदै पौडेलले नीजि क्षेत्रको सहयोगबाट परियोजना सफल हुने विश्वास व्यक्त गरे ।
होटेल पौवा,प्रालीका अध्यक्ष दुर्गा प्रसाद भण्डारीले जल पर्यटनको प्रचुर सम्भावना रहेको त्यस क्षेत्रमा पर्यटन क्षेत्रले नै लगानी गरेर त्यहाँको विकासमा जोड दिन आग्रह गरे । एक पटक मात्रै सरकारले लगानी गरेपछि त्यहाँ अन्य भौतिक पूर्वाधारका विकास लगायतका काममा नीजि क्षेत्र सहकार्य गर्न उत्सुक हुने उल्लेख गर्दै अध्यक्ष भण्डारीले पछिल्लो समय नेपालीमा पनि घुम्ने प्रचलन बढदै गएको बताए । उनले भने “ यो यस्तो उर्वर स्थान हो, यहाँ अनेकौ सम्भावना छ, पर्यटनबाट नै यहाँको विकासमा टेवा पुग्छ”
बाँके राष्ट्रिय निकुञ्जका प्रमुख संरक्षण अधिकृत वीरेन्द्र कँडेलले कुसुमबाट अगैया र अगैयाबाट मधुईसम्म मात्रै बोटिङ सञ्चालनको सम्भावना रहेको औल्याउदै त्यसबाट रोजगारीका अवसर सिर्जना हुने बताए । उनले त्यसका लागि निजी क्षेत्रको लगानी आवश्यक पर्ने धारणा व्यक्त गरे ।
उनँका अनुसार निकुञ्जको ओभरी नजिकका क्षेत्रमा हात्ती सफारी, जङ्गल सफारी र पैदलयात्राका प्याकेजसहित निजी क्षेत्रले नयाँ योजनाका खाका ल्याउँदा पर्यटन प्रवद्र्धनमा सघाउ पुग्ने छ । निकुञ्जको गिद्देनीचौरमा मचान निर्माण गरी जङ्गल क्षेत्रको दृश्यावलोकन, पैदलयात्रा, जङ्गल सफारीको समेत व्यवस्था गरिएको संरक्षण अधिकृत कँडेलको भनाइ छ ।
“कोहलपुर, ओभरी र अगैया क्षेत्रको तीन नाकाबाट नेचरगाइडसहित निकुञ्ज प्रवेशद्वारसम्बन्धी गतिविधि भइरहेका छन्, त्यहाँबाट प्रवेश गर्नुहुने पर्यटकले पर्यापर्यटनको आनन्द लिन सक्नुहुन्छ”, उनले भने ।
नेपाल एशोसियशन अफ टुर एण्ड ट्राभल्स एजेन्ट (नाट्टा) बाँके च्याप्टरका संस्थापक अध्यक्ष श्रीराम सिग्देलले जल पर्यटनका रुपमा ¥याफटिङ, फिसिङ, बोटिङ क्रुज लगायतका सम्भावना हुन सक्ने औल्याउदै त्यसबाट पर्यटकले मनोरञ्जन लिन सक्ने महत्पूर्ण गन्तव्यका रुपमा विकास गर्न आवश्यक भएको धारणा व्यक्त गरे । उनले यसका लागि स्थानीय तहले नीजि क्षेत्रलाई आर्कषण गर्ने योजना ल्याउनुपर्नेमा जोड दिदै एग्रो टुरिजमसँग जोडेर पनि प्रभावकारी कदम चाल्न सकिने बताए । “जल पर्यटन यस क्षेत्रका लागि नयाँ अनुभव पनि हुन सक्छ त्यसैले यसको सबैभन्दा राम्रो सम्भावना भएको क्षेत्र कुसुमदेखि अगैयासम्म हो” सिग्देलले भने ।
स्थानीय पत्रकार अर्जुन ओलीले जल पर्यटनका लागि प्रचुर सम्भावना रहेर पनि सरकारले काम गर्न नसकेको आरोप लगाउदै कुसुमदेखि अगैसम्म विगतमा ¥याफटिङ सञ्चालन भएको बताए । त्यस्तो ¥याफटिङ गरेर जलचर अवलोकन गर्दा भिन्दै आन्नद महसुस हुने उल्लेख गर्दै उनले यसलाई विगतमा लुम्विनी प्रदेश सरकारले प्राथमिकतमा राखेको जानकारी दिए । यस क्षेत्रको उत्तरतर्फ बाँके राष्ट्रिय निकुञ्ज रहेको छ भने दक्षिणतर्फ मध्यवर्ति क्षेत्र र राष्ट्रिय तथा सामुदायिक वन रहेको छ ।
प्रतिक्रिया