काठमाडौं । देशका विभिन्न भूभागमा आज वर्षाको सम्भावना रहे पनि तराईका केही क्षेत्रमा अत्यधिक गर्मी र तातो हावाको लहर चल्ने मौसमविद्ले बताएका छन् ।
जल तथा मौसम विज्ञान विभागका अनुसार लुम्बिनी र सुदूरपश्चिम प्रदेशका तराई भूभागका केही स्थानमा तातो हावाको लहर चल्ने सम्भावना छ । वाग्मती र गण्डकी प्रदेशका तराई क्षेत्रका केही स्थानमा पनि तातो दिन रहने अनुमान गरिएको छ ।
विभागले कोसी, वाग्मती, गण्डकी, कर्णाली र सुदूरपश्चिम प्रदेशका हिमाली तथा पहाडी भूभागमा सामान्यदेखि आंशिक बदली रहने जनाएको छ । कोसी प्रदेशका केही हिमाली तथा पहाडी क्षेत्रमा मेघगर्जन र चट्याङसहित मध्यम वर्षाको सम्भावना रहेको छ । वाग्मती, गण्डकी, लुम्बिनी, कर्णाली र सुदूरपश्चिमका केही स्थानमा पनि वर्षा हुन सक्ने अनुमान गरिएको छ ।
तराई क्षेत्रतर्फ कोसी प्रदेशका केही स्थान र मधेस प्रदेशका एक-दुई स्थानमा मेघगर्जन तथा चट्याङसहित वर्षा हुन सक्ने विभागले जनाएको छ ।
मौसमविद् विनोद पोखरेलका अनुसार पूर्वी नेपालमा गएरातिदेखि वर्षा भइरहेको छ । झापाको अनारमनी बिर्तामा पछिल्लो सात घण्टामा २३७ मिलिमिटर वर्षा मापन भएको छ, जुन अत्यधिक वर्षाको सूचक हो । उनले पूर्वी तराईबाहेक पश्चिमी तथा दक्षिणी भूभागमा आगामी एक सातासम्म उल्लेखनीय वर्षाको सम्भावना कम रहेको बताएका छन् ।
जलवायुविज्ञ धर्मराज उप्रेतीका अनुसार बंगालको खाडीबाट विकसित बादल पूर्वी नेपाल प्रवेश गरिसकेको छ । यसका कारण पूर्वी क्षेत्रमा बाढी र पहिरोको जोखिम बढ्न सक्ने भए पनि पश्चिमी नेपालमा भने अझै घाम लाग्ने अवस्था रहनेछ ।
विभागका अनुसार हाल नेपालमा उपल्लो वायुमण्डलमा रहेको पश्चिमी न्यूनचापीय रेखा, स्थानीय वायु तथा पूर्वीय वायुको आंशिक प्रभाव रहेको छ ।
यसैबीच, हिजो देशकै उच्च तापक्रम भैरहवामा ४१.४ डिग्री सेल्सियस मापन गरिएको थियो भने नेपालगन्जमा ४०.७ डिग्री सेल्सियस तापक्रम रेकर्ड भएको विभागले जनाएको छ ।
प्रतिक्रिया