रास्वपा महाधिवेशन : अझैसम्म सुरू हुन सकेन बन्दसत्र

चितवन । राष्ट्रिय स्वतन्त्र पार्टी (रास्वपा) को चितवनमा जारी महाधिवेशन अन्तर्गत बन्दसत्र निर्धारित समयमा सुरु हुन सकेको छैन । प्रतिनिधिहरूको नामावलीमा देखिएका त्रुटि सच्याउने कार्य जारी रहेकाले बन्दसत्रको समय लम्बिएको हो ।

महाधिवेशन कार्यतालिका अनुसार आइतबार बिहान साढे ८ बजेदेखि बन्दसत्र सुरु गर्ने तयारी गरिएको थियो । तर प्रतिनिधिहरूको अन्तिम नामावली टुंगो नलाग्दा कार्यक्रम निर्धारित समयमा अघि बढ्न नसकेको आयोजकले जनाएको छ ।

प्रतिनिधिहरूको नाम, विवरण तथा सहभागितासम्बन्धी विषयमा देखिएका त्रुटि सच्याउने काम भइरहेको र त्यसपछि मात्र बन्दसत्र सुरु गरिने बताइएको छ ।

रास्वपाको पहिलो महाधिवेशनमा देशभरबाट आएका प्रतिनिधिहरूको सहभागिता रहेको छ । बन्दसत्रमा पार्टीको भावी कार्यदिशा, सांगठनिक संरचना तथा नेतृत्व चयनका विषयमा छलफल हुने कार्यक्रम रहेको छ ।

नामावली व्यवस्थापनको काम सकिएपछि बन्दसत्र सुरु हुने जनाइएको छ ।