तातो दिन नघटेपछि नेपालगन्जमा पुनः ३ दिन गर्मी विदा

नेपालगन्ज । अत्याधिक गर्मी र तातो लहरको प्रकोप बढेपछि नेपालगन्ज उपमहानगरले पुनः गर्मी विदा दिने भएको छ । लगातारको तातो दिनका कारण जनजिवन नै असहज बन्दै गएपछि उपमहानगरले थप ३ दिन बिद्यालयहरुका लागि सार्वजनिक विदा घोषणा गरेको हो ।

असार १० गते देखि १२ गते सम्म गर्मी विदा दिन र विदा अवधिमा गृहकार्य दिई स्व-अध्ययनको व्यवस्था मिलाउन उपमहानगर अन्र्गतका शैक्षिक संस्थाहरुलाई उपमहानगरले अनुरोध गरेको छ । बिद्यालय आवतजावतमा कठिनाई उत्पन्न भई बिद्यार्थीको स्वास्थ्यमा प्रतिकुल असर पर्ने जोखिमलाई मध्यनजर गर्दै बिद्यालयहरुमा बिदा दिने निर्णय भएको सूचनामा उल्लेख छ ।

गर्मीको उच्च जोखिमका कारण अघिल्लो हप्ता पनि उपमहानगर सहित बाँकेका केही स्थानीय तहहरुले शैक्षिक संस्थाहरुमा गर्मी विदा दिएका थिए ।