विष्णु पौडेल सात दिन हिरासतमा राखेर अनुसन्धान गर्न अनुमति

काठमाडौं । विशेष अदालतले पूर्वउपप्रधान तथा अर्थमन्त्री तथा नेकपा एमालेका उपाध्यक्ष विष्णु पौडेललाई सात दिन हिरासतमा राखेर अनुसन्धान गर्न अनुमति दिएको छ ।

विशेष अदालतका सदस्यहरू नारायणप्रसाद पौडेल, हेमन्त रावल र उमेश कोइरालाको इजलासले सोमबारदेखि लागू हुने गरी सम्पत्ति शुद्धीकरण अनुसन्धान विभागलाई पौडेलमाथि सात दिन अनुसन्धान गर्न अनुमति दिएको हो ।

अदालतको आदेशसँगै विभागले पौडेलमाथिको अनुसन्धानलाई निरन्तरता दिनेछ । अनुसन्धानका लागि थप समय आवश्यक परे हालको म्याद सकिएपछि विभागले पुनः विशेष अदालतबाट म्याद थपको अनुमति लिनुपर्नेछ ।

पार्टी काममा सुर्खेतमा रहेका पौडेललाई सदरमुकाम बिरेन्द्रनगर स्थित शुभ होटलबाट पक्राउ गरिएको थियो । पौडेललाई सोमबार नै सुर्खेतबाट कोहलपुरसम्म प्रहरीको गाडीमा र कोहलपुरबाट सार्वजनिक सवारीबाट सडकमार्ग हुँदै काठमाडौं ल्याइएको थियो ।

पौडेलमाथि सम्पत्ति शुद्धीकरणसम्बन्धी मुद्दामा अनुसन्धान भइरहेको छ । अदालतको पछिल्लो आदेशसँगै उनी अब कम्तीमा सात दिन हिरासतमा रहने भएका छन् ।