बुटवल । प्युठानको स्वर्गद्वारी नगरपालिकाका उपप्रमुख मीनराज रानामगरको सवारी दुर्घटनामा निधन भएको छ । शनिबार उनी आफैंले चलाएको गाडी दुर्घटनामा परेको हो ।
स्वर्गद्वारीबाट धनवाङतर्फ जाँदै गरेको लु प्र १००१ झ ०००८ नम्बरको गाडी स्वर्गद्वारी नगरपालिका-२ स्थित बांगेसल्ला क्षेत्रमा दुर्घटनाग्रस्त भएको थियो । गाडी सडकबाट करिब ५०० मिटर तल खसेको प्रहरीले जनाएको छ ।
जिल्ला प्रहरी कार्यालय प्युठानका अनुसार दुर्घटनामा ५० वर्षीय रानामगरको घटनास्थलमै मृत्यु भएको हो ।
दुर्घटनाको कारण खुल्न बाँकी रहेको र घटनाबारे थप अनुसन्धान भइरहेको जिल्ला प्रहरी कार्यालय प्युठानका प्रहरी निरीक्षक सुजनबाबु विश्वकर्माले जानकारी दिए ।
रानामगर स्वर्गद्वारी नगरपालिकाका निर्वाचित उपप्रमुख थिए । उनको निधनप्रति स्थानीय तह, राजनीतिक दल तथा विभिन्न संघसंस्थाले दुःख व्यक्त गरेका छन् ।
प्रतिक्रिया