काठमाडौं । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले राष्ट्रिय स्वाधीनताको रक्षा, संविधानको संरक्षण र जनअधिकारको सम्वर्द्धनका लागि वामपन्थी शक्तिहरूबीच सहकार्य अपरिहार्य रहेको बताएका छन् ।
जननेता मदन भण्डारीको ७५ औँ जन्मजयन्तीका अवसरमा आयोजित ‘नेपालको कम्युनिष्ट आन्दोलन र जननेता मदन भण्डारी’ विषयक विचार गोष्ठी तथा मदन भण्डारी राष्ट्रिय पुरस्कार हस्तान्तरण समारोहलाई सम्बोधन गर्दै उनले वर्तमान राजनीतिक परिस्थितिमा समान विचार भएका वामपन्थी शक्तिहरूबीच एकता र सहकार्य आवश्यक भएको बताए ।
प्रचण्डले संवैधानिक अधिकारको रक्षा र राष्ट्रिय हितका सवालमा सबै वामपन्थी शक्तिले साझा पहल गर्नुपर्नेमा जोड दिँदै, “चाँडोभन्दा चाँडो समान विचार भएका दलहरू एकताबद्ध हुन जरुरी छ,” भने ।
उनले विगतका कमीकमजोरीको समीक्षा गर्न आफू तयार रहेको उल्लेख गर्दै राष्ट्रसामु देखिएका चुनौतीहरूको सामना गर्न सबै नेता-कार्यकर्ता एकजुट हुनुपर्ने धारणा राखे ।
प्रचण्डले लोकतान्त्रिक शक्तिसँग पनि सहकार्य गर्न आफू सकारात्मक रहेको बताउँदै राष्ट्रिय हितका मुद्दामा व्यापक राजनीतिक सहकार्य शीघ्र अघि बढ्नुपर्ने आवश्यकता औँल्याए ।
प्रतिक्रिया