पाँच दिनको गिरावटपछि सुनमा पुनः उछाल, एकैदिन तोलामा २ हजार ७ सय रुपैयाँ वृद्धि

काठमाडौं । लगातार पाँच कारोबार दिनसम्म ओरालो लागेको सुनको मूल्यमा शुक्रबार उल्लेखनीय सुधार देखिएको छ। एकैदिन प्रतितोला २ हजार ७ सय रुपैयाँले मूल्य बढेपछि सुनको घट्दो श्रृंखला रोकिएको हो।

नेपाल सुनचाँदी व्यवसायी महासंघका अनुसार शुक्रबार छापावाल सुनको मूल्य प्रतितोला २ लाख ८७ हजार ४ सय रुपैयाँ कायम भएको छ। अघिल्लो कारोबार दिन सुनको मूल्य २ हजार ४ सय रुपैयाँले घटेर प्रतितोला २ लाख ८४ हजार ७ सय रुपैयाँमा झरेको थियो।

महासंघले आज १० ग्राम सुनको मूल्य २ लाख ४६ हजार ४ सय रुपैयाँ निर्धारण गरेको जनाएको छ।

सुनसँगै चाँदीको मूल्य पनि बढेको छ। अघिल्लो दिन प्रतितोला ४ हजार ३४० रुपैयाँमा कारोबार भएको चाँदी शुक्रबार १७० रुपैयाँले महँगिएर प्रतितोला ४ हजार ५१० रुपैयाँ पुगेको महासंघले जनाएको छ।

लगातारको गिरावटपछि सुन र चाँदी दुवैको मूल्यमा आएको यो सुधारलाई बजारले नजिकबाट नियालिरहेको छ।