हेटौँडा । मकवानपुरको हेटौँडा उपमहानगरपालिका-१७ स्थित कर्रा खोलामा सोमबार बिहान आएको बाढीले एउटा ट्रक बगाएको छ । बाढीमा परेर ट्रक चालक घाइते भएका छन् ।
शिवम् सिमेन्ट उद्योगबाट चुनढुङ्गा अनलोड गरेर फर्किने क्रममा ना ७ ख ७६५ नम्बरको १२ चक्के आइचर ट्रक कर्रा खोलामा आएको बाढीमा फसेर बगेको प्रहरीले जनाएको छ ।
दुर्घटनामा चितवनको रत्ननगर नगरपालिका-१३ निवासी ३४ वर्षीय दीपक थिङ घाइते भएका छन् । बाढीले ट्रक बगाए पनि चालक थिङ पौडिएर सुरक्षित रूपमा बाहिर निस्कन सफल भएका थिए ।
घटनामा उनको खुट्टामा गम्भीर चोट लागेको बताइएको छ । घाइते थिङको हेटौँडास्थित एक निजी मेडिकलमा उपचार भइरहेको छ ।
लगातारको वर्षासँगै नदी तथा खोलाहरूमा पानीको बहाव बढेकाले प्रशासनले जोखिमयुक्त क्षेत्रबाट सावधानी अपनाउन सर्वसाधारणलाई आग्रह गरेको छ ।
प्रतिक्रिया