काठमाडौं । साताको कारोबारमा नेपाली शेयर बजारले उल्लेखनीय सुधार देखाएको छ। प्रधानमन्त्री वालेन्द्र शाहले पुँजी बजारका सरोकारवालासहित नियामक निकायका प्रमुखहरूसँग छलफल गरेको दिन नै नेपाल स्टक एक्सचेञ्ज (नेप्से) परिसूचक ४१.७० अंकले उकालो लाग्दै २,७१९.२४ बिन्दुमा पुगेको हो।
बजारमा हरियालीसँगै कारोबार रकम पनि उत्साहजनक रह्यो। नेप्सेका अनुसार दिनभर १ करोड २२ लाख ४५ हजार कित्ता शेयर खरिद–बिक्री हुँदा कुल ५ अर्ब ५१ करोड २६ लाख ८८ हजार रुपैयाँ बराबरको कारोबार भएको छ।
आज म्युचुअल फन्ड समूहबाहेक सबै प्रमुख उपसूचकहरू हरियो भएका छन्। बैंकिङ, विकास बैंक, जलविद्युत, वित्त, होटल तथा पर्यटन, उत्पादन तथा प्रशोधनलगायत अधिकांश क्षेत्रको परिसूचक बढेको छ।
कारोबार रकमका आधारमा आँगु खोला जलविद्युत कम्पनी अग्रस्थानमा रह्यो। उक्त कम्पनीको २९ करोड १५ लाख ५२ हजार रुपैयाँभन्दा बढीको शेयर किनबेच भएको नेप्सेले जनाएको छ।
बजारमा व्यापक सुधार देखिँदा २३९ कम्पनीको शेयर मूल्य बढेको छ भने ३२ कम्पनीको मात्रै शेयर मूल्यमा गिरावट आएको छ।
पुँजी बजार सुधार, लगानीकर्ता संरक्षण तथा नीतिगत सुधारका विषयमा प्रधानमन्त्रीले सरोकारवालासँग गरेको छलफलपछि बजारमा सकारात्मक मनोविज्ञान देखिएको विश्लेषण गरिएको छ। यद्यपि बजारको दीर्घकालीन दिशा भने आगामी नीतिगत निर्णय र आर्थिक गतिविधिमा निर्भर रहने जानकारहरूको भनाइ छ।
प्रतिक्रिया