नेपालगन्ज । नेपालगन्जको नगर क्षेत्रहरुमा रहेका बिभिन्न चोकहरुमा एकैदिन ६ वटा बिभिन्न राष्ट्रिय व्यक्तित्वहरुको सालिक अनावरण गरिएको छ । संबिधान जारी गर्दा प्रधानमन्त्री रहेका सुशील कोइरालादेखि बिभिन्न आन्दोलनका क्रममा तोडफोड गरिएका विभिन्न व्यक्तित्वहरुको सालिक पुनः निर्माण गरि आज अनावरण गरिएको हो ।
नेपालगन्ज उपमहानगरपालिकाले देश, समाज तथा लोकतान्त्रिक आन्दोलनमा महत्वपूर्ण योगदान पुर्याएका तथा जनआन्दोलनका क्रममा सहादत प्राप्त गरेका राष्ट्रिय व्यक्तित्वहरूको सालिकहरूको आज एक कार्यक्रमबीच अनावरण गरेको छ ।
नगर प्रमुख प्रशान्त विष्टले आज बिहान विभिन्न स्थानमा स्थापित ६ वटा सालिकको अनावरण गरे । संविधान जारी गर्दाका बखत प्रधानमन्त्री रहेका नेपाली कांग्रेसका पूर्व सभापति स्वर्गीय सुशील कोइरालाको अर्ध कदको नयाँ सालिक निर्माण गरि अनावरण गरिएको नेपालगन्ज उपमहानगरपालिकाले जनाएको छ । उपमहानगरका अनुसार सम्पूर्ण परियोजनामा करिब ७८ लाख रुपैयाँ खर्च भएको छ ।
स्वर्गीय कोइरालाको अर्ध कदको सालिक ट्राफिक चोक नजिक रहेको उद्यानमा स्थापना गरिएको छ भने गणेशमान चोकस्थित नेपाली कांग्रेसका नेता तथा २०४६ सालको जनआन्दोलनका सर्वोच्च कमाण्डर स्वर्गीय गणेशमान सिंहको पूर्ण कदको सालिक ३ लाख ३१ हजार रुपैयाँको लागतमा मर्मत गरी पुनःस्थापना गरिएको छ ।
नेपालगन्जको इदगाहा चौकमा नेपालका प्रथम जननिर्वाचित प्रधानमन्त्री विश्वेश्वरप्रसाद (वीपी) कोइरालाको पूर्ण कदको सालिक ९ लाख ७५ हजार रुपैयाँको लागतमा पुनःनिर्माण गरिएको नेपालगन्ज उपमहानगरपालिकाका निमित्त प्रमुख प्रशासकीय अधिकृत गोर्खबहादुर थापाले बताए ।
थापाका अनुसार धम्बोझी चोकस्थित स्वर्गीय पूर्वराजा वीरेन्द्र वीर विक्रम शाहको पूर्ण कदको सालिक ९ लाख ८२ हजार रुपैयाँमा निर्माण सम्पन्न गरिएको हो । त्यस्तै पुष्पलाल चोकस्थित नेपाल कम्युनिष्ट पार्टीका संस्थापक स्वर्गीय पुष्पलाल श्रेष्ठको सालिक ९ लाख ८७ हजार रुपैयाँको लागतमा पुनःनिर्माण गरिएको हो ।
यसैगरी, न्युरोडस्थित सहिद सेतु विकको अर्ध कदको सालिक ४ लाख ८३ हजार रुपैयाँको लागतमा पुनःनिर्माण गरिएको छ । विकले २०६२र६३ को जनआन्दोलनमा सोही ठाउँमा सहादत प्राप्त गरेकी थिइन् ।
उपमहानगरपालिकाका अनुसार गणेशमान सिंहको सालिक मर्मत गरिएको हो भने अन्य सबै सालिक नयाँ निर्माण गरिएका हुन् । कोइरालाको सालिक रहेको उद्यान बाहेक अन्य सबै सालिक अवस्थित चोकहरूको सौन्दर्यीकरणका लागि थप १८ लाख रुपैयाँ खर्च गरिएको निमित्त प्रमुख प्रशासकीय अधिकृत थापाले जानकारी दिए ।
सुशील कोइराला र राजा वीरेन्द्रको सालिक बाहेक अन्य सालिक भदौ २३ र २४ गते भएको ‘जेनजी’ विद्रोहका क्रममा क्षतिग्रस्त भएका थिए । राजा वीरेन्द्रको सालिक भने दोस्रो जनआन्दोलन २०६२/६३ का क्रममा तोडफोड गरिएको थियो ।
सालिक अनावरण पश्चात् प्रतिक्रिया दिँदै नगर प्रमुख विष्टले इतिहास, संस्कृति र समाजका विभिन्न कालखण्डसँग जोडिएका व्यक्तित्वहरूको सम्मान गर्नुका साथै सार्वजनिक सम्पदाको संरक्षण गर्नु उपमहानगरपालिकाको प्रमुख दायित्व भएको उल्लेख गरे ।
प्रतिक्रिया