काठमाडौं । काठमाडौं महानगरपालिका-१४ गाङ्खेलबाट सशस्त्र प्रहरीले एक लाख २० हजार क्याप्सुल लागुऔषधसहित तीन जनालाई पक्राउ गरेको छ ।
पक्राउ पर्नेमा भारत घर बताउने २६ वर्षीय राकेशकुमार साह, बारा कलैया उपमहानगरपालिका-५ का २१ वर्षीय नौसाद अन्सारी र ओखलढुंगा मानेभञ्ज्याङ गाउँपालिका-५ घर भई हाल ललितपुर महालक्ष्मी नगरपालिका-६ बस्ने २४ वर्षीय दीपक राई रहेका छन् ।
सशस्त्र प्रहरी बल नेपालका प्रहरी नायब उपरीक्षक शैलेन्द्र थापाका अनुसार भारतबाट अवैध रूपमा नेपाल ल्याएर लागुऔषध बिक्री-वितरण भइरहेको भन्ने विशेष सूचनाका आधारमा सशस्त्र प्रहरी बलको इन्टेलिजेन्स ब्युरोको विशेष टोलीले उनीहरूलाई पक्राउ गरेको हो ।
प्रहरीले उनीहरूको साथबाट ‘डामाडोल’ नामक लागुऔषधका एक लाख २० हजार क्याप्सुल, टाटा कम्पनीको बीएसी ७०१७ नम्बरको एउटा हात्ती गाडी, बागमती प्रदेश ०२-०६५ प ४४८९ नम्बरको मोटरसाइकल, तीन थान मोबाइल र नगद नेपाली रुपैयाँ बरामद गरेको जनाएको छ ।
पक्राउ परेका तीनै जनालाई बरामद लागुऔषध, नगद, सवारीसाधन तथा मोबाइलसहित आवश्यक अनुसन्धान तथा कानुनी कारबाहीका लागि सम्बन्धित निकायमा बुझाउने प्रक्रिया अघि बढाइएको सशस्त्र प्रहरीले जनाएको छ ।
प्रतिक्रिया