काठमाडौं । नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल प्रचण्डले सुनसरीको कप्तानगञ्जमा बोलबम धार्मिक यात्राका क्रममा भएको घटनाको निष्पक्ष छानबिन गरी वास्तविकता सार्वजनिक गर्न सरकारसँग माग गरेका छन्।
प्रतिनिधिसभाको बैठकमा विशेष समय लिएर बोल्दै प्रचण्डले उक्त घटनाले साम्प्रदायिक सद्भावमा असर पार्न सक्ने भन्दै चिन्ता व्यक्त गरे। उनले सुरक्षा निकायको भूमिकामाथि पनि प्रश्न उठाउँदै त्यहाँ गोली चलाउनै पर्ने अवस्था वास्तवमै थियो कि थिएन भन्ने विषयमा गम्भीर अध्ययन आवश्यक रहेको बताए।
‘सुनसरीको कप्तानगञ्जमा बोलबमको धार्मिक यात्राका सन्दर्भमा उत्पन्न विवाद चर्किएर दुःखद घटनासम्म पुग्यो। यसले कतै ठूलो साम्प्रदायिक विद्वेषको रूप लिने त होइन भन्ने चिन्ता सर्वत्र व्यक्त भइरहेको छ,’ उनले भने, ‘त्यो स्तरको गोली चलाउनै पर्ने अवस्था थियो कि थिएन भन्ने विषयमा अध्ययन गरी वास्तविकता बाहिर ल्याउन विशेष अपिल गर्न चाहन्छु।’
प्रचण्डले घटनापछि सरकारले सर्वदलीय बैठक आयोजना गरेकोमा धन्यवाद दिँदै सामाजिक तथा धार्मिक सद्भाव कायम राख्न सरकारले विशेष संवेदनशीलता अपनाउनुपर्ने बताए। साथै, उक्त बैठकमा प्रधानमन्त्री र गृहमन्त्रीको अनुपस्थितिलाई भने उनले चिन्ताको विषय भएको टिप्पणी गरे।
उनले घटनाका सम्पूर्ण पक्षको निष्पक्ष छानबिन गरी सत्यतथ्य सार्वजनिक गर्न र भविष्यमा यस्ता घटना दोहोरिन नदिन आवश्यक कदम चाल्न सरकारलाई आग्रह गरे।
प्रतिक्रिया