काठमाडौं । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवा साउन २६ गते स्वदेश फर्किने भएका छन्।
उपचारका क्रममा हङकङमा रहेका देउवा सोही दिन राति करिब ९ः४५ बजे काठमाडौं आइपुग्ने तयारी रहेको उनीनिकट नेताहरूले बताएका छन्।
देउवा गत फागुन १३ गते उपचारका लागि सिंगापुर गएका थिए। त्यसपछि थप उपचारका लागि ७ चैतमा हङकङ प्रस्थान गरेका थिए। उपचारका क्रममा विदेशमै रहेका उनले यसअघि अख्तियार दुरुपयोग अनुसन्धान आयोगलगायत सम्बन्धित निकायलाई पत्राचार गर्दै साउनभित्रै स्वदेश फर्किने जानकारी गराइसकेका छन्।
देउवाको स्वदेश फिर्तीसँगै नेपाली कांग्रेसभित्रको आन्तरिक राजनीतिक गतिविधि पनि थप सक्रिय हुने देखिएको छ । देउवा पक्षले पूर्वमहामन्त्री डा। शशांक कोइरालाको संयोजकत्वमा साउन २९ देखि ३१ गतेसम्म राष्ट्रिय भेला आयोजना गर्ने तयारी गरेको छ।
तर, स्वदेश फर्किएलगत्तै देउवा उक्त भेलामा प्रत्यक्ष सहभागी हुने वा नहुने विषयमा भने हालसम्म कुनै निर्णय सार्वजनिक भएको छैन।
प्रतिक्रिया