रसुवा, नुवाकोट र धादिङलाई विपद् संकटग्रस्त क्षेत्र घोषणा

काठमाडौं । सरकारले बाढीबाट प्रभावित रसुवा, नुवाकोट र धादिङलाई तीन महिनाका लागि विपद् संकटग्रस्त क्षेत्र घोषणा गरेको छ ।

मन्त्रिपरिषद्को आकस्मिक बैठकले बुधबार तीन जिल्लालाई विपद् संकटग्रस्त क्षेत्र घोषणा गर्दै प्रभावित क्षेत्रमा आवश्यक उद्धार, राहत तथा पुनःस्थापनाका कामलाई तीव्रता दिने निर्णय गरेको हो ।

बैठकमा बाढीबाट भएको क्षतिको समीक्षा गर्दै प्रभावित जिल्लामा आवश्यक सम्पूर्ण काम प्रभावकारी रूपमा अघि बढाउने निर्णय भएको एक मन्त्रीले जानकारी दिए ।

मन्त्रिपरिषद्ले सबै मन्त्रीलाई आ–आफ्नो मन्त्रालयसँग सम्बन्धित आवश्यक कामका लागि प्रभावित क्षेत्रमा प्रत्यक्ष रूपमा खटिनसमेत निर्देशन दिएको छ ।

सरकारले प्रभावित क्षेत्रमा तत्काल उद्धार तथा राहतसँगै आवश्यक पूर्वाधार पुनःस्थापना र नागरिकलाई आवश्यक सेवा उपलब्ध गराउने कामलाई प्राथमिकतामा राखेको जनाएको छ ।