रवीन्द्र ढाँट रोड टू यूएफसीको फाइनलमा

काठमाडौं । नेपाली एमएमए फाइटर रवीन्द्र ढाँट रोड टू यूएफसी सिजन-५ को फाइनलमा प्रवेश गरेका छन् ।

चीनको संघाइ इन्डोर रंगशालामा शुक्रबार सम्पन्न बेन्टमवेट विधाको सेमिफाइनलमा ढाँटले न्युजिल्यान्डका कासिब मर्डोचलाई स्प्लिट डिसिजनका आधारमा पराजित गर्दै फाइनल यात्रा तय गरेका हुन् ।

ढाँटसँग पराजित भएसँगै मर्डोचको लगातार आठ खेलसम्मको अपराजित यात्रा टुंगिएको छ ।

अब फाइनलमा ढाँटले जापानका रियो ताजिमासँग प्रतिस्पर्धा गर्नेछन् । ताजिमाले सेमिफाइनलमा भारतका चुंगरेन कोरेनलाई युनानिमस डिसिजनका आधारमा पराजित गर्दै फाइनलमा स्थान बनाएका हुन् ।

फाइनलमा ताजिमालाई पराजित गर्न सके ढाँटले रोड टू यूएफसी सिजन-५ को उपाधिसँगै विश्वकै चर्चित एमएमए संस्था यूएफसीसँग करार पाउनेछन् ।

नेपाली खेलाडीका लागि यूएफसीमा प्रवेशको सम्भावना बोकेको ढाँटको फाइनल भिडन्तलाई नेपाली खेलप्रेमीले विशेष चासोका साथ हेरिरहेका छन् ।