काठमाडौं । पृथ्वी राजमार्गअन्तर्गत धादिङको कृष्णभीरमा भासिएको सडक मर्मत तथा पहिरो पन्छाउने काम अघि बढाइएको छ।
रसुवामा बाढी आएको चार दिनपछि भदौ १४ गते भासिएको कृष्णभीरको सडक मर्मत कार्य बिहीबारदेखि अघि बढाइएको हो। पूर्वाधार विकास मन्त्रालयका अनुसार पहिरो पन्छाउनुअघि सडक क्षेत्रमा रहेका रूख कटानको काम सुरु गरिएको छ।
पहिरोको दुवै छेउबाट १८ जना जनशक्ति परिचालन गरी रूख कटान भइरहेको मन्त्रालयले जनाएको छ। रूख कटानको काम सम्पन्न हुनासाथ पहिरो पन्छाउन आवश्यक निर्माण उपकरण परिचालन गरिनेछ। पहिरो हटाउन आवश्यक उपकरण सडकको दुवै छेउमा तयारी अवस्थामा राखिएको मन्त्रालयको भनाइ छ।
राजमार्ग अवरुद्ध भएपछि काठमाडौं उपत्यका आवतजावत गर्ने यात्रु तथा मालवाहक सवारीसाधन प्रभावित भएका छन्। वैकल्पिक रूपमा हेटौंडा हुँदै काठमाडौं जोड्ने सडक सञ्चालनमा रहे पनि सबै सवारीसाधनले सोही मार्ग प्रयोग गर्दा त्यहाँ सवारी चाप बढेको छ।
कृष्णभीरको सडक अवरुद्ध हुँदा काठमाडौं उपत्यकाको आपूर्ति शृङ्खलासमेत प्रभावित भएको छ। दैनिक उपभोग्य वस्तुको ढुवानीमा समस्या देखिन थालेपछि बजारमा कृत्रिम अभाव सिर्जना गर्ने गतिविधिसमेत बढ्न थालेको बताइएको छ।
राजमार्गलाई यथाशीघ्र सञ्चालनमा ल्याउने उद्देश्यले सडक मर्मत तथा पहिरो पन्छाउने कामलाई प्राथमिकतामा राखेर तीव्र गतिमा अघि बढाइएको पूर्वाधार विकास मन्त्रालयले जनाएको छ।
प्रतिक्रिया