काठमाडौं । भोटेकोशीमा आएको भीषण बाढीका कारण हालसम्म एक हजार ३९२ जनाको शव फेला परेको छ भने चार हजार ८९ जना अझै सम्पर्कविहीन रहेका छन्। प्रहरी प्रधान कार्यालयले सार्वजनिक गरेको पछिल्लो विवरणअनुसार उद्धार तथा खोजी कार्य जारी छ।
फेला परेका शवमध्ये ५४२ पुरुष, ३३६ महिला र ५१४ वटा आंशिक अङ्ग मात्र रहेका छन्। जसमध्ये हालसम्म १०३ वटा शवको सनाखत गरी आफन्तलाई हस्तान्तरण गरिसकिएको प्रहरीले जनाएको छ। बाँकी शवको पहिचान र सनाखतका लागि डिएनए परीक्षणलाई प्राथमिकता दिइएको छ।
नेपाल प्रहरीका प्रवक्ता अविनारायण काफ्लेका अनुसार बेपत्ता सूचीमा रहेकामध्ये नेपाली नागरिकतर्फ दुई हजार ९०७ पुरुष र ५७२ महिला छन्। त्यस्तै, विदेशी नागरिकतर्फ २७२ पुरुष र ३२८ महिला अझै सम्पर्कविहीन छन्।
बाढी प्रभावित क्षेत्रबाट हालसम्म नौ हजार २८७ जना घाइतेको सफल उद्धार गरिएको छ, जसमा छ हजार ४०७ पुरुष, दुई हजार ८३० महिला र पहिचान नखुलेका ५० जना रहेका छन्। उद्धार गरिएकामध्ये दुई हजार ७८१ जनालाई हाल सुरक्षित रूपमा होल्डिङ सेन्टरमा राखिएको छ।
बाढीबाट ठूलो मानवीय क्षति भएकाले बेपत्ताको खोजी, घाइतेको उद्धार तथा शव व्यवस्थापनका लागि नेपाल प्रहरी, नेपाली सेना, सशस्त्र प्रहरी बल र स्थानीय प्रशासन प्रभावित क्षेत्रमा निरन्तर परिचालित छन्।
प्रतिक्रिया