काठमाडौं । नेपाल राष्ट्र बैंकले वाणिज्य बैंकहरूलाई एटिएममा एक सय रुपैयाँका नोट पनि राख्न निर्देशन दिएको छ । राष्ट्र बैंकले सोमबार विज्ञप्तिमार्फत सबै वाणिज्य बैंकलाई अनिवार्य रूपमा एटिएममा एक सय रुपैयाँको नोट राख्न भनेको हो ।
नेपाल राष्ट्र बैंक मुद्रा व्यवस्थापन विभाग आन्तरिक प्रशासन फाँटले नेपाल बैंकर्स संघलाई पठाएको पत्रमा बैंक तथा वित्तीय संस्थाहरुले हाल एटिएम मेसिनहरुवाट १,००० र ५०० दरका नोटहरु मात्र वितरण गर्दै आइरहेकोमा ग्राहकहरुले १०० दरका नोटहरु पनि वितरण गर्नुपर्ने माग गरेको र दशैंलाई लक्षित गरेर यस्तो निर्णय भएको उल्लेख गरेको छ ।
‘नजिकिँदै गरेको महान् चाड बडादशैको उपलक्ष्यमा १०० दरका नोटहरु पनि एटिएम मेसिनहरूबाट वितरण गर्न सकिएमा बैंक तथा वित्तीय संस्थाहरुमा पनि साना दरका नोट साट्ने ग्राहकहरुको भीड उल्लेख्य रुपमा कम हुने आँकलन गरिएको हुँदा यस सम्बन्धमा केही बैंकहरुसँग मौखिक जानकारी लिँदा प्राविधिक रुपमा सो व्यवस्था गर्न सकिने समेत जानकारी प्राप्त भएकोले आमसर्वसाधारण ग्राहकहरुको सुविधा एवं चाडपर्वको समयमा बैंकहरुमा हुने भीड व्यवस्थापनलाई ध्यानमा राखी १०० दरका नोटहरु पनि वितरण गर्ने व्यवस्था मिलाई सहयोग गरिदिनुहुन अनुरोध छ,’ पत्रमा भनिएको छ ।
प्रतिक्रिया