गण्डकी । कालीगण्डकी नदीमा आएको बाढीले पर्वतको जलजला गाउँपालिका-८ स्थित फर्से र लस्ती बजारमा पाँच घर बगाएको छ । बाढीका कारण उक्त क्षेत्रमा रहेका कैयौँ घर जोखिममा परेका छन् ।
जलजला गाउँपालिकाका अध्यक्ष राजु आचार्यका अनुसार बाढीको जोखिममा रहेका बस्तीका स्थानीयवासीलाई सुरक्षित स्थानमा सारिएको छ । कालीगण्डकीमा जलसतह बढेसँगै नदी आसपासका बस्तीमा जोखिम बढेको हो ।
कालीगण्डकी नदीको बाढीले म्याग्दी, पर्वत र बागलुङलगायत जिल्लाका तटीय क्षेत्रमा विभिन्न स्थानमा कटानसमेत गरेको छ । गएरातिदेखि कालीगण्डकीमा जलसतह बढेपछि नदी तटीय क्षेत्रका बासिन्दामा त्रास बढेको स्थानीय प्रशासनले जनाएको छ ।
लगातारको वर्षाका कारण नदीमा थप जलसतह बढ्न सक्ने सम्भावना रहेकाले तटीय क्षेत्रका बासिन्दालाई सतर्क रहन आग्रह गरिएको छ ।
प्रतिक्रिया