नेपालगन्ज । कोहलपुरको थापा मेडिकल घटना प्रयोजनमा सामाजिक सञ्जालमा भिडियो प्रशारण गर्ने हिमान्सु शाही पक्राउ परेका छन् । स्वास्थ्य जाँच गर्न आएकी युवतीले स्वास्थ्यकर्मीमाथि गरेको हातपातको मिडियो सार्वजनिक गर्ने शाहीलाई पक्राउ गरिएको प्रहरीले जनाएको छ ।
स्वास्थ्य परिक्षणका क्रममा स्वास्थ्यकर्मीले योनाङ्गमा स्पर्श गरेको भन्दै स्वास्थ्यकर्मी गणेश थापामाथि हातपात गरेको भिडियो सामाग्री अहिले सामाजिक सञ्जालमा भाइरल छ । समाजिक सञ्जालकर्ताहरुले योजनाबद्ध तरीकाले भिडियो निर्माण कर्ता र पीडित भनिएका २ जना महिलाले स्वास्थ्यकर्मीमाथि आक्रमण गरेको प्रतिक्रिया जनाएपछि प्रहरीले शाहीलाई पक्राउ गरेको हो ।
सहज स्वास्थ्य परीक्षण गराई राजिखुसी फर्केको केही मिनेटमा नै युटुबर र अर्की एक महिला सहित थापा मेडिकलमा पुगेको समूहले थापामाथि आक्रमण गर्नुका साथै गालिगलौज गरेको भिडियो शाहीले सामाजिक सञ्जालमा पोष्ट गरेका थिए । प्रहरीले महिला पक्षको उजुरीको आधारमा स्वास्थ्यकर्मी थापालाई पक्राउ गरेपनि भिडियो सार्वजनिक गर्ने शाही र कानुन विपरित हातपात गर्ने महिलाहरुलाई उन्मुक्ति दिएको भन्दै सामाजिक प्रयोगकर्ताहरुले प्रहरीको चर्को आलोचना गरिरहेका छन् ।
उनीहरुले स्वास्थ्यकर्मीबाट गलत भएको भए कानुनी उपचार खोज्नुपर्नेमा आक्रमणको बाटो अपनाउनु र सुनियोजित भिडियो खिच्ने क्यामेरा सहितको व्यक्ति लिएर जाने कार्यको छानबिन हुनुपर्ने माग गरेका छन् ।
युटुबर शाहीलाई नियन्त्रणमा लिएर घटनाको सघन अनुसन्धान गरिरहेको बाँके प्रहरी प्रवक्ता डीएसपी प्रतितसिंह राठौरले बताए । सो घटनालाई लिएर औषधी व्यवसायी परिषद र सिएमए संघले पनि छानबिन अघि बढाएको जनाएको छ । प्रहरीले भने सो घटनामा स्वास्थ्यकर्मी थापा विरुद्ध करणी सम्बन्धी कसुरमा ७ दिन म्याद लिएर अनुसन्धान गरिरहेको छ ।
प्रतिक्रिया