काठमाडौं । आन्तरिक राजस्व विभागले सञ्चालन गर्दै आएको करदाता प्रोत्साहन उपहार कार्यक्रममा सहभागी हुन उपभोक्ताले असोज ३१ गतेभित्र खरिद बिलको विवरण प्रविष्ट गर्नुपर्ने भएको छ ।
विभागका अनुसार २०८३ साल असोज १६ देखि ३१ गतेसम्मको अवधिमा नगद भुक्तानी गरी वस्तु तथा सेवा खरिद गर्ने उपभोक्ताले शनिबारभित्र आफ्नो खरिद बिलको विवरण अनलाइन प्रणालीमा प्रविष्ट गर्नुपर्नेछ ।
उक्त अवधिका बिल प्रविष्ट गरेका उपभोक्ताले प्राप्त गर्ने उपहार कुपनको गोलाप्रथा कात्तिक १ गते खोलिने र विजेताको घोषणा गरिने विभागले जनाएको छ ।
कार्यक्रममा सहभागी हुन उपभोक्ताले विभागको आधिकारिक वेबसाइट ird.gov.np मार्फत सम्बन्धित प्रणालीमा गई खरिद बिलको विवरण प्रविष्ट गर्न सक्नेछन् ।
विभागले पुरस्कार प्राप्त गर्न खरिद बिल अनिवार्य भएकाले वस्तु तथा सेवा खरिद गर्दा अनिवार्य रूपमा बिल लिन उपभोक्तालाई आग्रह गरेको छ । त्यस्तै, वस्तु तथा सेवा बिक्री गर्दा अनिवार्य रूपमा बिक्री बिल वा बीजक जारी गर्न व्यवसायीहरूलाई अनुरोध गरेको छ ।
करदाता प्रोत्साहन उपहार कार्यक्रममार्फत उपभोक्तालाई खरिद बिल लिन प्रोत्साहित गर्नुका साथै व्यवसायमा बिलबिजक जारी गर्ने प्रवृत्तिलाई बढावा दिने विभागको उद्देश्य छ ।
प्रतिक्रिया