काठमाडौं । सरकारले चिकित्सा शिक्षाका विभिन्न शैक्षिक कार्यक्रममा ४१८ सिट थप गरेको छ । चिकित्सा शिक्षा आयोगको २८औँ बैठकले शैक्षिक सत्र २०८३/८४ का लागि एमबीबीएस, बीएस्सी नर्सिङ र बीएनएसलगायतका कार्यक्रममा सिट वृद्धि गर्ने निर्णय गरेको हो ।
प्रधानमन्त्री बालेन्द्र शाहको अध्यक्षतामा बसेको बैठकले ८४ वटा शिक्षण संस्थामा विभिन्न तह र विषयका गरी कुल ९ हजार ६९१ सिट निर्धारण गरेको आयोग स्रोतले जनाएको छ । यस वर्ष एमबीबीएसमा मात्रै ११० सिट थपिएका छन् ।
आयोगले कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयलाई पहिलोपटक एमबीबीएस अध्ययनका लागि ५० सिट निर्धारण गरेको छ । त्यस्तै, धरानस्थित बीपी कोइराला स्वास्थ्य विज्ञान प्रतिष्ठान र नेपाली सेनाद्वारा सञ्चालित नेपाली सेना स्वास्थ्य विज्ञान प्रतिष्ठानमा एमबीबीएसतर्फ ३०/३० सिट थप गरिएको छ ।
यी तीन संस्थामा थप गरिएका सिट जोड्दा एमबीबीएसतर्फ ११० सिट वृद्धि हुन्छ । यससँगै एमबीबीएस अध्ययनका लागि कुल सिट संख्या २ हजार ७४५ पुगेको छ । आयोगले एमबीबीएस सञ्चालन गर्ने शिक्षण संस्थाका लागि ५० देखि १३० सिटसम्म निर्धारण गरेको छ ।
यस वर्ष एमबीबीएसमा सिट थप गरिएका संस्थामध्ये बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानले अब १३०र१३० विद्यार्थीलाई अध्ययन गराउन पाउनेछन् ।
नर्सिङमा ३०८ सिट वृद्धि
चिकित्सा शिक्षा आयोगले नर्सिङतर्फ पनि ३०८ सिट थप गरेको छ । बीएस्सी नर्सिङमा २१० र बीएनएसमा ९८ सिट वृद्धि गरिएको आयोगका सदस्यसचिव हरिप्रसाद निरौलाले जानकारी दिएका छन् ।
आयोगका अनुसार यस वर्ष सिट निर्धारणका लागि ९० वटा शिक्षण संस्थाले स्वमूल्यांकन फारम भरेर आवेदन दिएका थिए । तीमध्ये अनुगमन प्रतिवेदन र आवश्यक मापदण्डका आधारमा ८४ वटा संस्थाका लागि मात्रै सिट निर्धारण गरिएको हो ।
शिक्षण संस्थाको भौतिक पूर्वाधार, शिक्षक तथा अन्य जनशक्तिको अवस्था र उपलब्ध क्षमताका आधारमा सिट निर्धारण गरिएको आयोग स्रोतले जनाएको छ । निजी मेडिकल कलेजको सिट संख्या भने यस वर्ष यथावत् राखिएको स्रोतको भनाइ छ ।
गेटालाई ५० सिट, पूर्वाधारबारे प्रश्न
कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयलाई एमबीबीएस अध्ययनका लागि ५० सिट निर्धारण गर्ने निर्णयसँगै यसको पूर्वाधारबारे प्रश्न उठेको छ ।
एमबीबीएस कार्यक्रम सञ्चालनका लागि ३०० शय्याको अस्पताल आवश्यक पर्ने भए पनि गेटामा हाल ५० शय्याको अस्पताल मात्रै सञ्चालनमा रहेको बताइएको छ । विश्वविद्यालयले शिक्षण अस्पतालका रूपमा प्रयोग गर्न धनगढीको सेती प्रादेशिक अस्पताल, महेन्द्रनगरको महाकाली प्रादेशिक अस्पताल, टीकापुर अस्पताल र लम्कीचुहा प्रादेशिक अस्पतालसँग २० वर्षका लागि सम्झौता गरेको छ । आयोगले ती अस्पतालसँगको सम्झेतालाई समेत आधार बनाएर सिट निर्धारण गरेको जनाइएको छ ।
चिकित्सा शिक्षा आयोगले यस वर्ष विभिन्न शैक्षिक कार्यक्रमका लागि सिट निर्धारण गर्दा शिक्षण संस्थाको क्षमता, उपलब्ध पूर्वाधार र अनुगमन प्रतिवेदनलाई आधार बनाएको जनाएको छ ।
प्रतिक्रिया