काठमाडौं । नेपाल राष्ट्र बैंकले तिहार पर्वलाई लक्षित गर्दै सर्वसाधारणका लागि सुनको असर्फी तथा चाँदीका मेडालियन बिक्री गर्ने भएको छ।
राष्ट्र बैंकको मुद्रा व्यवस्थापन विभागअन्तर्गत टक्सार महाशाखाले कात्तिक १९ र २० गते दुई दिन सुनको असर्फी तथा चाँदीका मेडालियन बिक्री गर्न लागेको हो।
राष्ट्र बैंकले जारी गरेको सूचनाअनुसार बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म बिक्री गरिनेछ। मौज्दात रहेसम्म पङ्क्तिबद्ध सेवाग्राहीलाई असर्फी तथा मेडालियन उपलब्ध गराइने महाशाखाले जनाएको छ।
राष्ट्र बैंकका अनुसार सर्वसाधारणले प्रतिव्यक्ति २.५ ग्रामको एउटा सुनको असर्फी खरिद गर्न सक्नेछन्। त्यस्तै, १० ग्रामका लक्ष्मी र गणेशको चित्र अंकित चाँदीका मेडालियन पनि खरिद गर्न पाइनेछ। एक व्यक्तिले बढीमा दुई थानसम्म खरिद गर्न सक्ने व्यवस्था गरिएको छ।
असर्फी तथा मेडालियनको मूल्य खरिद गर्ने दिनको बजार मूल्यका आधारमा निर्धारण गरिनेछ। राष्ट्र बैंकले दैनिक बिहान करिब ११ बजे मूल्य निर्धारण गरेपछि मात्रै बिक्री प्रक्रिया सुरु गर्ने जनाएको छ।
खरिद गर्न इच्छुक व्यक्तिले नेपाली नागरिकता, राष्ट्रिय परिचयपत्र वा ती कागजातको नम्बर उल्लेख भएको अन्य कुनै प्रमाणपत्रको प्रतिलिपिसहित स्वयं उपस्थित हुनुपर्नेछ।
खरिदकर्ताले नगद वा क्यूआरमार्फत भुक्तानी गर्न सक्ने व्यवस्था गरिएको छ।
तिहारमा लक्ष्मीपूजा तथा धनतेरसका अवसरमा सुनचाँदीका सिक्का र मेडालियन किन्ने परम्परालाई लक्षित गर्दै राष्ट्र बैंकले हरेक वर्ष यस्ता धातुका सिक्का तथा मेडालियन बिक्री गर्दै आएको छ।
प्रतिक्रिया