आगामी ३ दिन देशैभर भारी वर्षा हुने, सावधानी अपनाउन जल तथा मौसम विज्ञान विभागको आग्रह

काठमाडौं । जल तथा मौसम विज्ञान विभागका महानिर्देशक कमलराम जोशीले आगामी तीन दिन उच्च सावधानी अपनाउन आम नागरिकलाई आग्रह गरेका छन् । आगामी तीन दिन देशभर भारी वर्षा हुने भन्दै उच्च सावधानी अपनाउन जोशीले आग्रह गरेका हुन् ।

बुधवार गृह मन्त्रालयमा बसेको मनसुन पूर्वतयारी तथा प्रतिकार्य बैठकमा बोल्दै महानिर्देशक जोशीले आगामी तीन दिन देशभर भारी वर्षा हुने भएकाले उच्च सतर्कता अपनाउन आम नागरिकलाई आग्रह गरे ।

उनले आगामी तीन दिन गण्डकी प्रदेशमा अझै बढी र तराईका सबै जिल्लाहरुमा भारी वर्षा हुने र खोलामा जलस्तर बढेर बाढीको समस्या निम्तिन सक्ने बताए।

उनले भोलिसम्मै तराईको लगभग सबै खोलाहरु र गण्डकी प्रदेश सम्म अझ भारी वर्षा हुने देखिएको अवस्था रहेको बताए । खोलाको जलस्तर बढेर अझ डुबान र बाढीले समस्या दिने जोशीको अनुमान छ ।