काठमाडौं । केहिदिनयता ठूला भवनमा पार्किङका लागि छुट्याइएको बेसमेन्ट खाली गराउन डोजरसहितको मार्चमा रहेका काठमाडौं महानगरपालिकाका मेयर बालेन शाह राहदानी विभाग पुगेका छन् ।
शाह शुक्रबार दिउँसो त्रिपुरेश्वरस्थित राहदानी विभागको पार्किङ खाली गराउन त्यहाँ पुगेका हुन् । पार्किङका लागि नक्शापास गरिएको स्थानमा विभागले कार्यालय राखेको भन्दै नगरप्रहरी, महानगरीय ट्राफिक प्रहरीसँगको सहकार्यमा त्यसलाई हटाउन शाह त्यहाँ पुगेका हुन् । विभागले बेसमेन्टलाई वेटिङ रुमका रुपमा प्रयोग गरेको छ ।
राहदानी विभागमा दैनिक हजारौंको संख्यामा सेवाग्राहीको भीड लाग्ने भएपनि व्यवस्थित पार्किङ नहुँदा आसपासको सडक र गल्लीमा सेवाग्राहीले पार्किङ गर्नुपर्ने बाध्यता रहेको छ ।
यसअघि शाहले नयाँ वानेश्वरस्थित भवनहरु, काठमाडौं मल, आरबी कम्प्लेक्स, अल्फाबिटा लगायतका भवनमा तोडफोड गरिसकेका छन् । काठमाडौं महनगरपालिकाले बबरमहलमा रहेको जिल्ला अदालतलाई समेत पार्किङ खाली गराउन पूर्जी काटेको छ ।
महानगरले जारी गरेको ३५ दिने सार्वजनिक सूचनाको समय सकिएपछि मेयर शाह डोजरसहित सडकमा उत्रिएका हुन् । शाहको कामलाई सर्वसाधारणले स्वागत गरेका छन् भने व्यापारी व्यवसायी र निजी भवनका संचालकहरुले विरोध गरेका छन् ।
प्रतिक्रिया