रुपन्देही २ बाट राजु गुरुङले दर्ता गराए उम्मेदवारी, एमालेको गढ भत्काउने दाबी

बुटवल । रुपन्देहीको क्षेत्र नम्बर २ बाट प्रतिनिधि सभा सदस्य पदका लागि सत्ता गठबन्धनको तर्फबाट नेकपा एकीकृत समाजवादीका नेता राजु गुरुङले उम्मेदवारी दर्ता गराएका छन् । सत्ता गठबन्धनका साझा उम्मेदवारकारुपमा गुरुङले आइतबार दिउँसो निर्वाचन अधिकृतको कार्यालय पुगेर उम्मेदवारी दर्ता गराएका हुन् ।

उनीसँगै मनोनयन दर्ता गराउन रुपन्देही क्षेत्र नम्बर २ का गठबन्धन दलका कार्यकर्ताहरु निर्वाचन अधिकृतको कार्यालय सम्म पुगेका थिए । युवाहरुमाझ लोकप्रिय मानिँदै आएका गुरुङले एमाले उपाध्यक्ष विष्णु पौडेलसँग प्रतिस्पर्धा गर्ने छन् ।

मनोनयन दर्तापछि सञ्चारकर्मीसँग कुरा गर्दै गुरुङले यसपटक गठबन्धनले एमालेको गढ तोडिने दाबी गरे । उनले पौडेलले झुट्टा आश्वासन बाँड्दै आएको आरोप लगाउँदै मतदाता यसपटक भ्रममा नपर्ने जिकिर गरे ।

रुपन्देही क्षेत्र नम्बर २ बाट प्रदेशसभामा (क)बाट काँग्रेसका दीर्घबहादुर केसी र (ख) मा नेकपा माओवादीका नेता बामदेव क्षेत्री घिमिरेले उम्मेदवारी दिएका छन् ।