शताब्दी पुरुष सत्यमोहन जोशीको निधनमा नेपालगन्जमा शोकसभा

नेपालगन्ज । शताब्दी पुरुष सत्यमोहन जोशीको स्मरणमा नेपालगन्जमा शोकसभाको आयोजना गरिएको छ । नेवाः दय दबु सहित नेपालगन्जमा क्रियाशिल साहित्य तथा भाषागत संस्थाहरुको आयोजनामा जोशीको निधनमा शोकसभाको आयोजना गरिएको हो ।

शोकसभामा बोल्ने वक्ताहरुले स्वर्गिय सत्यमोहन जोशीको बहुआयामिक व्यक्तित्वको चर्चा गरेका थिए । उनीहरुले सत्यमोहन जोशीलाई सरारको राष्ट्रिय विभूति घोषणा गर्न पनि माग गरे । भाषा, साहित्य, कला र वाङमय क्षेत्रमा जोशीले चलाएको अभियानलाई निरन्तरता दिने प्रतिबद्धता व्यक्त गर्दै उनीहरुले स्वर्गिय जोशीको जीवन आफैमा विश्वबिद्यालय भएको जिकिर गरे ।

कार्यक्रममा बोल्दै बामपन्थी लेखक नरेन्द्रजङ पिटरले सत्यमहोन जोशी सबै नेपालीको साझा व्यक्तित्व भएको बताए ।

नेपालगन्ज उपमहानगरपालिकाका प्रमुख प्रशान्त बिष्टले उपयुक्त प्रस्ताव ल्याउन संघ संस्थाहरुलाई आह्वान गर्दै स्थानीयतह सत्यमोहन जोशीको योगदानलाई स्थापित गर्न तयार रहेको बताए ।

नेवाः दय दबुका अगुवा कृष्णप्रसाद श्रेष्ठले स्वर्गिय जोशीलाई राज्यले राष्ट्रिय विभूति घोषणा गर्न माग गरे । उनले हरेक वर्ष जोशीको स्मरणमा कार्यक्रम गर्ने प्रतिबद्धता पनि जनाए ।

कार्यक्रममा प्राध्यापक डा. जनार्दन शर्मा, प्राज्ञ सभा सदस्य श्री हरि प्रसाद तिमिल्सिना , महेन्द्र पुस्तकालयका अध्यक्ष बलराम यादव लगायतले सत्यमोहन जोशीको बहुआयामिक व्यक्तित्वको चर्चा गरेका थिए ।

१९७७ बेशाख ३० गते जन्मेका जोशकिो गत आसोज ३० गते निधन भएको थियो । भाषा, साहित्य र लोकसंस्कृतिमा विशेष योगदान गरेका जोशीलाई सरकारले २०७४ बैशाख २१ गते वाङमय शताब्दी पुरुष घोषणा गरेको थियो ।